رەسەيلىك الپينيست ناتاليا ناگوۆيتسينانىڭ ۇلى الەۋمەتتىك جەلىدە بيلىككە جۇگىنىپ، اناسىن قۇتقارۋعا كومەك سۇرادى. ول الپينيست اناسىنىڭ ءالى ءتىرى ەكەنىنە سەنىمدى ەكەنىن مالىمدەدى، دەپ حابارلايدى "ادىرنا" ۇلتتىق پورتى Tengri Travel-گە سىلتەپ.
ۇلىنىڭ "ۆكونتاكتە" پاراقشاسىندا جاريالانعان جازبادا بىلاي دەلىنگەن:
«مەن – رەسەيلىك الپينيست ناتاليا يگورەۆنا ناگوۆيتسينانىڭ ۇلىمىن. كوپتەگەن رەسەيلىك باق-تىڭ حابارلاۋىنشا، انام 12 تامىزدا قىرعىزستانداعى جەڭىس شىڭىنان (پيك پوبەدى، 7439 م) ءتۇسىپ كەلە جاتقاندا جاراقات العان جانە كوماندا مۇشەلەرى ونى 7000 مەتردەن جوعارى بيىكتىكتە جالعىز قالدىرىپ كەتكەن. انام — تاجىريبەلى الپينيست، ەكىنشى سپورتتىق رازرياد يەسى، دەنساۋلىعى مىقتى، فيزيكالىق تۇرعىدا وتە جاقسى دايىندالعان. maga.fpv ەسىمدى قولدانۋشى جىبەرگەن ۆيدەودا، بايلانىس ۇزىلگەننەن كەيىن 7 كۇن وتكەندە، انامنىڭ قولىن بۇلعاپ، كۇش-قۋاتى بار ەكەنىن انىق كورۋگە بولادى. مەن ونىڭ ءتىرى ەكەنىنە تولىق سەنىمدىمىن»، – دەپ جازدى ول.
سونداي-اق، ول اۋا رايىنىڭ قولايلى جاعدايى جاقىن ەكى كۇندە عانا ساقتالاتىنىن ايتىپ، اناسىنىڭ ءالى ءتىرى ەكەنىن دالەلدەۋ ءۇشىن بيىك تاۋلى اۋماقتا اۋەدەن ۆيدەوتۇسىرىلىم ۇيىمداستىرۋعا كومەكتەسۋدى سۇرادى.
رەسەيدىڭ تەرگەۋ كوميتەتىنىڭ (سك) Telegram-ارناسىندا اتالعان جاعدايعا بايلانىستى جاڭا مالىمدەمە جاريالاندى.
«رەسەيلىك الپينيست ناتاليا ناگوۆيتسينانىڭ ۇلىنىڭ وتىنىشىنە بايلانىستى تەرگەۋ كوميتەتىنىڭ توراعاسى الەكساندر باسترىكين ورتالىق اپپاراتقا رەسەي توتەنشە جاعدايلار مينيسترلىگىمەن بىرلەسىپ ارەكەت ەتۋگە جانە جاعدايدىڭ بارلىق ءمان-جايىن انىقتاۋعا تاپسىرما بەردى»، - دەلىنگەن.
باق مالىمەتى بويىنشا، 47 جاستاعى الپينيست 12 تامىزدا اياعىن سىندىرىپ العان. ونىڭ سەرىكتەسى كومەككە كەتكەن. قۇتقارۋشىلار وتىرعان تىكۇشاق اۋا رايىنىڭ ناشارلىعىنان اپاتتى جاعدايدا قونۋعا ءماجبۇر بولدى.
19 تامىزدا درون ناتاليانى سوڭعى رەت ءتىرى كۇيىندە تۇسىرگەن. ال 23 تامىزدا اۋا رايىنىڭ ناشارلاۋىنا بايلانىستى (قار، بوران، لاۆينا قاۋپى) قۇتقارۋ جۇمىستارى تولىق توقتاتىلدى.
ال الماتى قالاسىنىڭ توتەنشە جاعدايلار دەپارتامەنتى جاستاردى تاۋعا شىعاردا ءوز مۇمكىندىگىن دۇرىس باعالاپ، الەۋمەتتىك جەلىدەگى كورىنىسكە الدانىپ قالماۋعا شاقىردى.
