قىرعىزستانداعى جەڭىس شىڭىندا اياعىن سىندىرىپ العان رەسەي ءالپينيسى قازا تاپقان بولۋى مۇمكىن دەگەن اقپارات تارادى، دەپ حابارلايدى “ادىرنا” ۇلتتىق پورتالى.
Mash مالىمەتىنشە، 47 جاستاعى ناتاليا ەسىمدى تۋريست 12 تامىز كۇنى شىڭنان تومەن ءتۇسىپ كەلە جاتىپ اياعىن سىندىرىپ العان. سەرىكتەسى وعان العاشقى مەديتسينالىق كومەك كورسەتىپ، ارتىنان كومەككە لاگەرگە تۇسكەن. ايەل سول بيىكتىكتە جالعىز قالعان.
باق-تا تاراعان دەرەككە ساي، شىڭدا يتاليالىق جانە نەمىس ازاماتتارى ناتالياعا جاردەم بەرۋگە تىرىسقانىمەن، العان جاراقاتىنا بايلانىستى تومەن تۇسىرە الماعان. ولار ءالپينيستى جىلى قاپقا وراپ قالدىرعان. وكنىشكە قاراي، يتالياندىق ءالپينيستىڭ ءوزى قىرعىزستان تاۋلارىندا كوز جۇمعان، ونىڭ دەنەسى ءالى شىڭدا جاتىر.
مامانداردىڭ ايتۋىنشا، زارداپ شەككەن ايەلدىڭ شاتىرى تاۋدىڭ ويىس تۇسىندا ورنالاسقان. بۇل جەردەن تومەنگە تۇسەتىن جول ۇزاق ءارى قاۋىپتى. الايدا تاۋ باسىنداعى اۋماقتا اۋا تەمپەراتۋراسى مينۋس 26 گرادۋسقا دەيىن تومەندەپ، قار جاۋى ىقتيمال.
سونداي-اق، ناتاليادان تىرشىلىك بەلگىلەرى بايقالماي وتىرعانىن حابارلاندى.
Mash باسىلىمى تاراتقان دەرەككە سايكەس، ءتورت جىل بۇرىن ءدال وسى وڭىردەگى حان-ءتاڭىرى شىڭىندا ناتاليانىڭ كۇيەۋى اۋىر جاراقات الىپ، سال بولىپ قالعان. سول كەزدە قۇتقارۋشىلار ايەلدى امان الىپ شىققانىمەن، ونىڭ جۇبايىن قۇتقارىپ قالا الماعان.
قازىر رەسەيدىڭ قىرعىزستانداعى ەلشىلىگى جاعدايدى باقىلاپ وتىر. دەگەنمەن رەسمي تۇردە ءالپينيستىڭ قازاسى جونىندە ءالى حابارلانعان جوق.
ايتا كەتەيىك، بيىكتىگى جەڭىس شىڭىنىڭ بيىكتىگى 7 مىڭ مەتردى قۇرايدى.
