سەنبى كۇنى تاڭەرتەڭ تاتارستان استاناسى قازان قالاسى جاپپاي دروندار شابۋىلىنا ۇشىرادى، دەپ حابارلايدى "ادىرنا" ۇلتتىق پورتالى.
جەرگىلىكتى بيلىك مالىمەتىنشە، سەگىز دروننىڭ التاۋى تۇرعىن ۇيلەرگە، ونىڭ ىشىندە ەكى بيىك عيماراتقا سوعىلعان. ۋكراينا تاراپى بۇل وقيعاعا قاتىستى پىكىر بىلدىرمەدى.
«جالپى سەگىز درون تىركەلدى. ونىڭ ءبىرى ونەركاسىپتىك كاسىپورىنعا، ءبىرى وزەننىڭ ۇستىنە، التاۋى تۇرعىن ۇيلەرگە ءتۇستى. وسى ۋاقىتقا دەيىن قازا تاپقاندار مەن زارداپ شەككەندەر جوق»، – دەپ حابارلادى تاتار-ينفورم اگەنتتىگى.
رەسەيدىڭ قورعانىس مينيسترلىگى شابۋىل بارىسىندا ءۇش دروندى اۋە قورعانىسى جۇيەسىمەن اتىپ تۇسىرگەنىن جانە تاعى ءۇش دروندى راديوەلەكتروندى كۇرەس قۇرالدارىمەن بەيتاراپتاندىرعانىن مالىمدەدى. مينيسترلىك مالىمەتىنشە، شابۋىل ساعات 7:40-تان 9:20-عا دەيىن سوزىلىپ، دروندار ءۇش تولقىندا ءارتۇرلى باعىتتان جىبەرىلگەن.
Telegram-ارنالاردا جاريالانعان ۆيدەولاردا درونداردىڭ ءبىرى 37 قاباتتى «لازۋرنىە نەبەسا» تۇرعىن ءۇي كەشەنىنە سوعىلعانى بايقالادى. وقيعا ورنىنا تاڭەرتەڭ تاتارستان باسشىسى رۋستەم ميننيحانوۆ كەلىپ، جاعدايمەن تانىستى. بيلىك مالىمەتى بويىنشا، تۇرعىندار زارداپ شەكپەگەنىمەن، جوعارى قاباتتاردان ءليفتسىز ەۆاكۋاتسيالانۋعا ءماجبۇر بولعان. عيماراتتىڭ تەرەزەلەرى سىنعان.
دروندار 23 قاباتتى «مانحەتتەن» تۇرعىن ءۇي كەشەنى مەن كلارا تسەتكين كوشەسىندەگى بەس قاباتتى تۇرعىن ۇيگە دە سوعىلعان.
ال ۋكراينا تاراپى شابۋىلعا قاتىستى پىكىر بىلدىرگەن جوق.
