ءماجىلىس دەپۋتاتى ايدوس سارىم الەۋمەتتىك جەلىلەردە قازاقستاننىڭ ۆيتسە-پرەزيدەنت لاۋازىمىن بۇرىنعى پرەزيدەنت نۇرسۇلتان نازارباەۆتىڭ ۇلكەن قىزى داريعا نازارباەۆا يەلەنۋى مۇمكىن دەگەن الاڭداۋشىلىقتارعا جاۋاپ بەرىپ، مۇنداي بولجامعا ەشقانداي نەگىز جوق ەكەنىن ايتتى. بۇل تۋرالى ول پارلامەنت كۋلۋارىندا مالىمدەدى، دەپ حابارلايدى "ادىرنا".
«مەنىڭشە، داريعا نۇرسۇلتانقىزىنىڭ ءداۋىرى ءوتتى. ول، ول ما ساياسي تۇرعىدا وتە سۇيكىمسىز تۇلعاعا اينالىپ كەتكەن ساياساتكەر. ارينە، ەشكىم وعان قوعامدىق نە ساياسي ىسپەن اينالىسۋعا، قانداي دا ءبىر پارتياعا مۇشە بولۋعا تىيىم سالا المايدى. ال پارتيالار ونى ءوز قاتارىنان كورگىسى كەلە مە، كەلمەي مە، بۇل ەندى باسقا ماسەلە. سوندىقتان داريعا ۆيتسە-پرەزيدەنت نەمەسە پرەمەر بولادى دەگەن اڭگىمەگە مۇلدە يلانبايمىن. ەل اراسىنان «داريعا نۇرسۇلتانقىزى، كەلىڭىز، ءبىزدى قۇتقارىڭىز…» دەپ ايتاتىن ادام تابىلادى دەپ تە ويلامايمىن. شىنىمدى ايتسام، مۇنداي جاعدايدىڭ ورىنا الارىنا سەنۋ قيىن»، – دەدى ايدوس سارىم.
ونىڭ پىكىرىنشە، بۇرىنعى پرەزيدەنتتىڭ ۇلكەن قىزىنىڭ ساياساتقا قايتا ورالۋ ىقتيمالدىعى ستاتيستيكالىق تۇرعىدا «نولگە جاقىن».
سونداي-اق دەپۋتاتقا ونىڭ «حالىق كەڭەسىنە» مۇشە بولا الۋ مۇمكىندىگى تۋرالى سۇراق قويىلعان.
«وعان ول نە ءۇشىن كەرەك؟ ول جامان ءومىر ءسۇرىپ ءجۇر دەپ ويلايسىز با؟» – دەپ دەپۋتات ريتوريكالىق جاۋاپ بەردى.
