ءماجىلىس دەپۋتاتى، ساياساتتانۋشى ايدوس سارىم رۋسلان جاقسىلىقوۆتىڭ قورعانىس ءمينيسترى قىزمەتىنەن كەتۋى قوعامدا تۋىنداعان ءتۇرلى بولجامدارعا قاتىستى پىكىر ءبىلدىردى. ونىڭ ايتۋىنشا، بۇل وتستاۆكا كۇتپەگەن جاعداي ەمەس، پرەزيدەنت توقاەۆتىڭ الدىن الا ويلاستىرىلعان جانە بىرنەشە اي بويى تالقىلانعان شەشىمى بولعان، دەپ حابارلايدى “ادىرنا”.
«بۇل شەشىم دەپۋتاتتار مەن مەملەكەتتىك اپپارات ءۇشىن توسىن ەمەس. جاقسىلىقوۆ مىرزانىڭ وتستاۆكاسى بىرنەشە ايدان بەرى تالقىلانىپ جۇرگەن تاقىرىپ بولاتىن»، – دەدى ايدوس سارىم DW-گە بەرگەن سۇحباتىندا.
ول جاقسىلىقوۆتىڭ قىزمەتتەن كەتۋىنە قاتىستى الەۋمەتتىك جەلىلەر مەن كەيبىر باق-تا تاراعان نۇسقالاردى نەگىزسىز دەپ باعالاپ، بۇل قادامنىڭ ەشقانداي دا توتەنشە وقيعالارمەن بايلانىستى ەمەسىن اتاپ ءوتتى.
«جاقسىلىقوۆ قاڭتار وقيعاسى كەزىندە مينيستر بولىپ تاعايىندالدى. بۇل ارميا مەن ارنايى قىزمەتتەردىڭ السىرەگەن، سەنىمسىزدىك جايلاعان كەزى بولاتىن. پرەزيدەنت توقاەۆ سول كەزدە باتىل شەشىم قابىلداپ، تاجىريبەسى مول، اسكەري ورتادا بەدەلى بار گەنەرالدى تاڭدادى. بۇل – سول كەزدەگى جاعدايعا ساي دۇرىس شەشىم بولدى»، – دەدى سارىم.
سونداي-اق ول جاقسىلىقوۆتىڭ مينيستر رەتىندەگى قىزمەتىنە وڭ باعا بەردى. ونىڭ ايتۋىنشا، گەنەرال-پولكوۆنيك قارۋلى كۇشتەردى دامىتۋعا باعىتتالعان ماڭىزدى زاڭ جوبالارىن جۇزەگە اسىرىپ، اسكەري ينفراقۇرىلىمدى كۇشەيتۋدە ۇلكەن ۇلەس قوستى.
«ەگەر ءبىر كۇنى قارۋلى كۇشتەردىڭ تاريحى جازىلاتىن بولسا، جاقسىلىقوۆ – سول تاريحتا قالاتىن مينيستر. ول — ينستيتۋتسيونالدىق رەفورمالاردى جۇزەگە اسىرعان، ارميانىڭ بولاشاعىنا نەگىز قالاعان تۇلعا. قازىرگى پارلامەنت شاقىرىلىمى كەزىندە اسكەر مەن اسكەري قىزمەتكە قاتىستى بەس ماڭىزدى زاڭ قابىلداندى»، – دەدى دەپۋتات.
بۇعان قوسا، ايدوس سارىم ۇلىبريتانيامەن اسكەري ىنتىماقتاستىق تۋرالى كەلىسىمگە قاتىستى تاراعان قاۋەسەتتەردى دە جوققا شىعاردى.
«بارلىعى كەلىسىلگەن. بۇل كەلىسىمدە ونداعان مىڭ وفيتسەر تۋرالى ءسوز بولىپ وتىرعان جوق. بۇل — ناقتى باعىتتار بويىنشا دايىندالاتىن جەكەلەگەن ماماندار. بىراق كەيبىر كورشىلەرىمىزدىڭ باتىسپەن قارىم-قاتىناسقا قاتىستى شامادان تىس سەزىمتالدىعىنا بايلانىستى ءتۇرلى الىپ-قاشپا اڭگىمەلەر تاراپ كەتىپ جاتادى»، – دەپ ءتۇسىندىردى ول.
ايدوس سارىم قازىرگى گەوساياسي جاعدايدا قورعانىس مينيسترلىگىنە جاڭا تەحنولوگيالار مەن زاماناۋي تاسىلدەر قاجەت ەكەنىن ايتتى. وسى سەبەپتى جاڭا مينيستر داۋرەن كوسانوۆتىڭ تاعايىندالۋى — ارميانى جاڭعىرتۋ جولىنداعى قيسىندى قادام ەكەنىن اتاپ ءوتتى.
