قازاقستان پارلامەنتى ءبىر كۇن ىشىندە التى كونستيتۋتسيالىق زاڭدى ەكىنشى وقىلىمدا ماقۇلدادى، دەپ حابارلايدى "ادىرنا".
سارسەنبى كۇنى قابىلدانعان قۇجاتتاردىڭ قاتارىندا «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» جانە «قازاقستان حالىق كەڭەسى تۋرالى» كونستيتۋتسيالىق زاڭدار بار.
سونىمەن قاتار «قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭ دا قولداۋ تاپتى.
پارلامەنت «قازاقستان رەسپۋبليكاسىنىڭ استاناسىنىڭ مارتەبەسى تۋرالى» كونستيتۋتسيالىق زاڭدى ەكىنشى وقىلىمدا ماقۇلدادى.
بۇدان بولەك، «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» كونستيتۋتسيالىق زاڭ، «قازاقستان رەسپۋبليكاسىنىڭ كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» قۇجات تا ماقۇلداندى. ول كونستيتۋتسياعا سايكەستەندىرۋ، سايلاۋ جانە پروكۋراتۋرا سالالارىنداعى زاڭنامانى جەتىلدىرۋگە باعىتتالعان.
زاڭ جوبالارى قازاقستانداعى كونستيتۋتسيالىق رەفورمالار اياسىندا قارالدى. ولاردىڭ ماقساتى – زاڭنامانى كونستيتۋتسياعا سايكەستەندىرۋ، مەملەكەتتىك باسقارۋ جۇيەسىندەگى وكىلەتتىكتەردى قايتا ءبولۋ، بيلىك تارماقتارى اراسىنداعى تەپە-تەڭدىكتى كۇشەيتۋ جانە باسقارۋ تيىمدىلىگىن ارتتىرۋ.
