قازاق قىزى اسەل روبەرتس سلوۆەنياداعى اقش-تىڭ جاڭا ەلشىسى اتاندى. ونىڭ كانديداتۋراسىن اقش سەناتى رەسمي تۇردە بەكىتتى، دەپ حابارلايدى “ادىرنا”.
اقش سەناتىنىڭ رەسمي دەرەگىنە سايكەس, تاعايىنداۋدى 46 سەناتور قولداپ داۋىس بەرسە، 43 سەناتور قارسى شىقتى. بۇعان دەيىن اسەل روبەرتستىڭ كانديداتۋراسىن دونالد ترامپ ۇسىنعان بولاتىن. ول ناۋرىز ايىندا سەناتتىڭ ءتيىستى كوميتەتىندە اڭگىمەلەسۋدەن وتكەن ەدى.
اسەل روبەرتس جامبىل وبلىسىندا دۇنيەگە كەلگەن، ال بالالىق شاعى مەن مەكتەپ جىلدارى الماتىدا وتكەن. كەيىن ول وتباسىمەن بىرگە اقش-قا قونىس اۋدارعان.
اسەل امەريكادا مەكتەپ بىتىرگەننەن كەيىن، دجوردجتاۋن ۋنيۆەرسيتەتىنىڭ حالىقارالىق قاتىناستار فاكۋلتەتىنە وقۋعا تۇسكەن. ستۋدەنت كەزىندە اق ۇيدە تاعىلىمدامادان ءوتىپ، كەيىن اقش مەملەكەتتىك قىزمەت جۇيەسىندە ەڭبەك جولىن باستاعان.
1990 جىلداردىڭ سوڭىنان بەرى روبەرتس اقش پرەزيدەنتىنىڭ پروتوكول دەپارتامەنتىندە جۇمىس ىستەگەن. ول اق ۇيدەگى قىزمەتىن باراك وباما اكىمشىلىگى كەزىندە باستاپ، كەيىن دجو بايدەن تۇسىندا دا مانسابىن جالعاستىرعان.
ءار جىلدارى اسەل امەريكالىق مەملەكەتتىك پروتوكول جۇيەسىندە جوعارى لاۋازىمداردى اتقاردى. 2021 جىلى اقش مەملەكەتتىك پروتوكول قىزمەتىنىڭ باسشىسى مىندەتىن ۋاقىتشا اتقارۋشى بولدى.
ايتا كەتسەك، قازاقستاننىڭ سلوۆەنياداعى ەلشىسى – تاجىريبەلى ديپلومات التاي ابيبۋللاەۆ.
بۇل قىزمەتكە ونى قاسىم-جومارت توقاەۆ 2025 جىلدىڭ كۇزىندە تاعايىنداعان. ول 30 جىلعا جۋىق ەڭبەك جولىندا قازاقستان سىرتقى ىستەر مينيسترلىگىندە، پولشا، اۋستريا جانە حورۆاتياداعى ەلشىلىكتەردە جۇمىس ىستەگەن، سونداي-اق ۆەناداعى ەقىۇ جانىندا قازاقستاننىڭ وكىلى بولعان.
قوعامدا بۇل جاعداي ەلىمىزدىڭ تاريحىنداعى العاشقى ەرەكشە وقيعا رەتىندە تالقىلانىپ جاتىر. ەۋروپانىڭ ءبىر قالاسىندا ەكى قازاق ەلشىسى ەكى ءتۇرلى مەملەكەتتىڭ اتىنان قىزمەت اتقارۋدا. كوپشىلىك مۇنى حالىقارالىق ديپلوماتياداعى ەرەكشە ءسات دەپ باعالاپ وتىر. بۇعان دەيىن مۇنداي جاعداي بولماعان.
