تسيفرلاندىرۋ جانە جاساندى ينتەللەكت جىلى اياسىندا جامبىل وبلىسىنىڭ جامبىل پوليتەحنيكالىق جوعارى كوللەدجى بازاسىندا «جي يننوۆاتسيالار اكادەمياسى» زەرتحاناسى ىسكە قوسىلدى.
سالتاناتتى اشىلۋ راسىمىنە وبلىس اكىمى ەربول قاراشوكەەۆ قاتىستى.
مەملەكەت باسشىسىنىڭ تاپسىرماسىنا سايكەس قۇرىلعان بۇل زەرتحانا جاساندى ينتەللەكت، باعدارلامالاۋ جانە زاماناۋي تسيفرلىق تەحنولوگيالار باعىتىندا ءبىلىم بەرەتىن ماڭىزدى يننوۆاتسيالىق الاڭعا اينالماق.
جاڭا ورتالىق ءوڭىردىڭ تسيفرلىق الەۋەتىن ارتتىرۋعا سەرپىن بەرىپ، ستۋدەنتتەردىڭ جاساندى ينتەللەكت پەن IT سالاسىنداعى پراكتيكالىق داعدىلارىن جەتىلدىرۋگە، وزىق تەحنولوگيالاردى مەڭگەرۋىنە جانە بولاشاق ماماندىقتارىنا بەيىمدەلۋىنە كەڭ مۇمكىندىك ۇسىنادى.
بۇل ماڭىزدى جوبا قازاقستان مەن قىتاي اراسىنداعى ۇزاق جىلداردان بەرى قالىپتاسقان بەرىك دوستىق پەن ءوزارا ىنتىماقتاستىقتىڭ، سونداي-اق جەرگىلىكتى كاسىپكەرلەردىڭ قولداۋىنىڭ ناتيجەسىندە جۇزەگە استى.
ەربول قاراشوكەەۆ الداعى ۋاقىتتا كوللەدج قابىرعاسىنان جاساندى ينتەللەكتىنى تەرەڭ مەڭگەرگەن، ەل دامۋىنا ۇلەس قوساتىن، باسەكەگە قابىلەتتى جاس مامانداردىڭ تۇلەپ شىعاتىنىنا سەنىم ءبىلدىردى.
جامبىل پوليتەحنيكالىق جوعارى كوللەدجى – رەسپۋبليكاداعى ۇزدىك 10 وقۋ ورنىنىڭ قاتارىندا. بۇگىندە مۇندا 2518 ستۋدەنت ءبىلىم الۋدا. ولاردىڭ 1934-ءى ءدۋالدى وقىتۋ جۇيەسىمەن قامتىلىپ، ءبىلىم ورداسى مەن وڭىردەگى ءىرى ءوندىرىس ورىندارىندا تەوريا مەن تاجىريبەنى قاتار مەڭگەرۋدە.
2025 جىلى كوللەدجدى 593 تۇلەك ءتامامدادى، ولاردىڭ 61 پايىزى تۇراقتى جۇمىسپەن قامتىلدى. بۇل – وقۋ ورنىنىڭ ەڭبەك نارىعىمەن تىعىز بايلانىسىنىڭ ايقىن كورسەتكىشى.
– بۇگىن كوللەدج ستۋدەنتتەرى ۇلكەن مۇمكىندىككە يە بولدى. مۇندا ءبىز جاساندى ينتەللەكتتىڭ تەرەڭىنە بويلاپ، روبوتوتەحنيكانىڭ قىر-سىرىن مەڭگەرە الامىز. بولاشاقتا ءوز جوبالارىمىز ارقىلى الەمگە تانىلىپ، ەلىمىزدىڭ ابىرويىن اسقاقتاتۋدى ماقسات ەتىپ وتىرمىز، – دەيدى 2-كۋرس ستۋدەنتى نۇرتاس ءپارىن.
بۇل كۇنى جامبىل پوليتەحنيكالىق جوعارى كوللەدجى، ت. رىسقۇلوۆ جانە قورداي اۋداندارىنداعى كوللەدجدەردە ءبىلىم بەرۋ-وندىرىستىك باعىتتاعى حيميا جانە اۋىل شارۋاشىلىعى كلاستەرلەرى اشىلدى.
بۇل باستاما ءبىلىم مەن ءوندىرىستى ۇشتاستىرىپ، عىلىم مەن تاجىريبە اراسىنداعى بايلانىستى نىعايتادى. سونىڭ ناتيجەسىندە ەڭبەك نارىعىنا قاجەتتى، زاماناۋي تالاپتارعا ساي بىلىكتى ماماندار دايارلاۋعا جول اشىلادى.
ايتا كەتەيىك، جامبىل وبلىسىندا جاساندى ينتەللەكت تەحنولوگيالارى قوعامدىق قاۋىپسىزدىك، دەنساۋلىق ساقتاۋ، ءبىلىم بەرۋ جانە مەملەكەتتىك باسقارۋ سالالارىنا كەڭىنەن ەنگىزىلۋدە. اتاپ ايتقاندا، بەت-الپەتتى تانۋ، ونكولوگيالىق اۋرۋلاردى ەرتە انىقتاۋ، اۋديو قوڭىراۋلاردى تالداۋ جانە جاساندى ينتەللەكت اسسيستەنتتەرىن ازىرلەۋ باعىتىنداعى جوبالار تابىستى جۇزەگە اسۋدا.
بۇدان بولەك، جاساندى ينتەللەكت جانە اقپاراتتىق تەحنولوگيالار ماماندارىن دايارلاۋ جۇمىستارى جۇيەلى تۇردە جولعا قويىلىپ، جوعارى وقۋ ورىندارىمەن بىرلەسكەن تسيفرلىق كادر دايارلاۋ جانە IT تۇلەكتەرىن جۇمىسپەن قامتۋ تەتىكتەرى كۇشەيتىلۋدە.
ۇقساس جاڭالىقتار
