2026 جىلدىڭ 17 شىلدەسىندە «تازا قازاقستان» جالپىۇلتتىق ەكولوگيالىق اكتسياسى اياسىندا تاراز قالاسىنداعى تۇرار رىسقۇلوۆ اتىنداعى ورتالىق مادەنيەت جانە دەمالىس ساياباعىندا «تازا قالا – دەنى ساۋ قوعام» تاقىرىبىندا ەكولوگيالىق اكتسيا ۇيىمداستىرىلدى.
تۇرار رىسقۇلوۆ اتىنداعى ورتالىق مادەنيەت جانە دەمالىس ساياباعى – تاراز قالاسىنىڭ تۇرعىندارى مەن قوناقتارى ءجيى دەمالاتىن، قالا تىنىسىن ايقىندايتىن ماڭىزدى مادەني-ساۋىقتىرۋ ورىندارىنىڭ ءبىرى. ساياباق اۋماعىندا جاسىل جەلەكتەر، دەمالىس ورىندارى، سەرۋەندەۋ الاڭدارى ورنالاسقان. مۇندا قالالىق مادەني ءىس-شارالار، مەرەكەلىك باعدارلامالار، ەكولوگيالىق اكتسيالار مەن قوعامدىق باستامالار وتكىزىلىپ تۇرادى. سوندىقتان كەشەن اۋماعىن اباتتاندىرۋ، سانيتارلىق تازالىعىن ساقتاۋ جانە كەلۋشىلەر ءۇشىن قولايلى جاعداي قالىپتاستىرۋ باعىتىنداعى جۇمىستار تۇراقتى تۇردە جۇرگىزىلۋدە.
ەكولوگيالىق اكتسياعا قالا جاستارى، ەرىكتىلەر جانە جاستار ۇيىمدارىنىڭ وكىلدەرى بەلسەندى قاتىستى. ءىس-شارا بارىسىندا قاتىسۋشىلار كەسەنە اۋماعىندا تازالىق جۇمىستارىن جۇرگىزىپ، قۋراعان اعاشتار مەن تۇرمىستىق قالدىقتاردى جينادى.
يگى باستاماعا ۇيىتقى بولعان تاراز قالاسى جاستار رەسۋرستىق ورتالىعىنىڭ ديرەكتورى ازامات لەسبەكتىڭ ايتۋىنشا، «تازا قازاقستان» جالپىۇلتتىق ەكولوگيالىق اكتسياسى – قورشاعان ورتانى قورعاۋعا، قالا تازالىعىن ساقتاۋعا جانە تۇرعىنداردىڭ ەكولوگيالىق مادەنيەتىن قالىپتاستىرۋعا باعىتتالعان ماڭىزدى جوبا.
– تازالىق – اينالامىزدى رەتكە كەلتىرۋ عانا ەمەس، ول ادامنىڭ تابيعاتقا، تۋعان جەرىنە دەگەن كوزقاراسىنىڭ كورىنىسى. بۇگىن تۇرار رىسقۇلوۆ اتىنداعى ورتالىق مادەنيەت جانە دەمالىس ساياباعىندا ۇيىمداستىرىلعان سەنبىلىككە قاتىسقان ءاربىر ازامات قالامىزدىڭ كوركەيۋىنە ءوز ۇلەسىن قوستى. ەكولوگيالىق مادەنيەت كۇندەلىكتى ادەتتەن، قاراپايىم ارەكەتتەن باستالادى. ەگەر ارقايسىمىز قورشاعان ورتاعا جاۋاپكەرشىلىكپەن قاراساق، تازا ءارى جايلى قالا قالىپتاستىرۋعا بىرگە قول جەتكىزەمىز»، – دەدى ازامات لەسبەك.
اكتسياعا 100-دەن استام جاستار ۇيىمدارىنىڭ وكىلدەرى، ەرىكتىلەر مەن بەلسەندى جاستار قاتىستى. ناتيجەسىندە ورتالىق ساياباق اۋماعىنان 3 تونناعا جۋىق قوقىس شىعارىلىپ، مادەني-ساۋىقتىرۋ ورىندارىنىڭ اينالاسى تازارتىلدى.
ايتا كەتۋ كەرەك، وسىنداي ەكولوگيالىق شارالار وبلىستىڭ بىرقاتار اۋداندارىندا ۇيىمداستىرىلىپ، ەرىكتىلەر مەن جاستار اۋىل كوشەلەرىن، وزەن جاعالاۋلارىن، ورتالىق ساياباقتار مەن قوعامدىق ورىنداردى تازالاۋ جۇمىستارىن جۇرگىزدى.
اكتسيا بارىسىندا قاتىسۋشىلارعا قورشاعان ورتانى قورعاۋ، ەكولوگيالىق مادەنيەتتى قالىپتاستىرۋ جانە قوعامدىق ورىنداردا تازالىق ساقتاۋ جونىندە ءتۇسىندىرۋ جۇمىستارى جۇرگىزىلدى. ۇيىمداستىرۋشىلار مۇنداي باستامالار تۇرعىنداردىڭ تابيعاتقا جاناشىرلىقپەن قاراۋىنا، تۋعان ولكەنىڭ تازالىعى مەن كوركەيۋىنە ۇلەس قوسۋىنا ىقپال ەتەتىنىن اتاپ ءوتتى.
جالپى، «تازا قازاقستان» اكتسياسى اياسىندا جامبىل وبلىسىندا اۋقىمدى جۇمىستار جۇزەگە اسىرىلۋدا. بۇگىنگى كۇنگە دەيىن وڭىردە 48,5 مىڭ جاسىل جەلەك وتىرعىزىلىپ، 3,5 مىڭ شاقىرىم كوشە جولدارى تازارتىلدى. سونداي-اق 831 شاقىرىم ارىق جۇيەلەرى مەن كانالدار رەتكە كەلتىرىلىپ، 685,5 مىڭ شارشى مەتر ساياباقتار مەن سكۆەرلەردىڭ اۋماعى اباتتاندىرىلدى. ناتيجەسىندە 6,1 مىڭ جۋىق توننادان استام كۇل-قوقىس شىعارىلعان.
«تازا قازاقستان» اكتسياسى اياسىنداعى مۇنداي شارالار ءوڭىردىڭ ەكولوگيالىق احۋالىن جاقسارتۋمەن قاتار، قوعامدا تازالىق پەن جاۋاپكەرشىلىك مادەنيەتىن قالىپتاستىرۋعا، قورشاعان ورتاعا ۇقىپتى قاراۋ داعدىلارىن نىعايتۋعا زور ۇلەس قوسۋدا.
#TazaChallenge @TazaQazaqstan.
