بايزاق: جارىلىستان قازا تاپقانداردىڭ وتباسىنا 20 ملن تەڭگەدەن بەرىلىپ، نەسيەلەرى كەشىرىلەدى

3949
Adyrna.kz Telegram

توتەنشە جاعدايلار مينيسترلىگىنىڭ ءباسپاسوز حاتشىسى تالعات ءۋالي بايزاق اۋدانىنداعى اسكەري بولىمدەگى جارىلىس سالدارىنان قازا تاپقانداردىڭ وتباسىنا 20 ملن تەڭگەدەن بەرىلەتىنىن اتاپ ءوتتى، دەپ حابارلايدى "ادىرنا" ۇلتتىق پورتالى.

- قازا تاپقان قىزمەتكەرلەردىڭ وتباسىنا رەسپۋبليكالىق بيۋدجەتتەن 10 ملن تەڭگە كولەمىندە كومەك كورسەتىلەدى. ال جەرگىلىكتى بيۋدجەتتەن 5 ملن تەڭگە، سونداي-اق تجم ازاماتتىق قورعاۋ ورگاندارىنىڭ قىزمەتكەرلەرى ءبىر كۇندىك جالاقىلارىن ارنايى ەسەپشوتقا اۋدارعان بولاتىن. وندا شامامەن 100 ملن تەڭگە جينالدى. ول قارجىدان 5 ملن تەڭگەدەن بولىنەدى. وسىلايشا قازا تاپقانداردىڭ وتباسىلارىنا 20 ملن تەڭگە كولەمىندە اۋدارىلادى،-دەدى تجم ءباسپاسوز حاتشىسى.

تالعات ءۋالي بۇل ماتەريالدىق كومەكتەن بولەك جارىلىس سالدارىنان قازا بولعان قۇتقارۋشىلاردىڭ وتباسىلارىنا قىزمەتكەردىڭ لاۋازىمىنا قاراي بەس جىلدىق جالاقىسى دا اۋدارىلاتىنىن ايتتى. سونداي-اق مارقۇم بولعانداردىڭ نەسيەلەرى دە كەشىرىلمەكشى.

- جامبىل وبلىسى اكىمدىگى قازا تاپقان ازاماتتاردىڭ قانداي دا ءبىر ەكىنشى دەڭگەيلى بانكتەردە نەسيەسى بولاتىن بولسا، سونى دا كەشىرۋگە كەلىسسوزدەر جۇرگىزگەنىن ايتتى. ال ەسەپشوتتتا جينالعان قاراجات ءارتۇرلى دەڭگەيدە جاراقات العاندارعا دا ۇلەستىرىلەتىن بولادى. ونىڭ كولەمى العان جاراقاتىنا بايلانىستى بىرنەشە ساناتقا ءبولىنىپ، تولەمدەر جۇرگىزىلەدى،-دەدى تالعات ءۋالي.

بۇدان وزگە مينيسترلىكتىڭ ءباسپاسوز حاتشىسى جارىلىستان امان قالان ازاماتتار الداعى ۋاقىتتا ءبىرىنشى جانە ەكىنشى دەڭگەيلى "ايبىن", "حالىق قاھارمانى" سەكىلدى ءتۇرلى مەملەكەتتىك ناگرادالارمەن ماراپاتتاۋعا ۇسىنىلعانىن ايتتى.

ەستەرىڭىزگە سالا كەتسەك، 26 تامىزدا جامبىل وبلىسى، بايزاق اۋدانىنداعى 28349 اسكەري بولىمىندە ءورت شىعىپ، ارتى جويقىن جارىلىسقا ۇلاستى. وقيعا سالدارىنان قازا تاپقاندار سانى 17-گە جەتتى. مارقۇمداردىڭ ونى ازاماتتىق قورعاۋ ورگاندارىنىڭ، التاۋى — قورعانىس مينيسترلىگىنىڭ اسكەري قىزمەتكەرلەرى. بىرەۋى — اسكەري پروكۋرور.

"ادىرنا" ۇلتتىق پورتالى

پىكىرلەر