قازاقستاندىق وقۋشى ءاليحان سەرىكوۆ Stanford University ۋنيۆەرسيتەتىنە Restrictive Early Action ەرتە ىرىكتەۋ باعدارلاماسى بويىنشا تولىق قارجىلىق گرانتپەن وقۋعا قابىلداندى. بۇل تۋرالى بۇگىن، 26 ناۋرىزدا وقۋ-اعارتۋ مينيسترلىگى جازدى، دەپ حابارلايدى «ادىرنا» ءتىلشىسى.
Stanford الەمدەگى ەڭ تاڭداۋلى جوعارى وقۋ ورىندارىنىڭ قاتارىنا كىرەدى. ۋنيۆەرسيتەتكە قابىلداۋ دەڭگەيى شامامەن 3,6% قۇرايدى، ال شەتەلدىك تالاپكەرلەر ءۇشىن بۇل كورسەتكىش ودان دا تومەن.
ءاليحان – روبوتوتەحنيكا بويىنشا الەم چەمپيوناتىنىڭ جۇلدەگەرى. ول FIRST جارىستارىنا قاتىسىپ، باستاپقى دەڭگەيدەگى FIRST LEGO League كەزەڭىنەن باستاپ جوعارى دەڭگەيدەگى FIRST Tech Challenge ساناتىنا دەيىن جەتكەن. كوماندا قۇرامىندا ورتالىق ازيا ايماقتىق چەمپيوناتىندا جەڭىسكە جەتىپ، حيۋستون قالاسىندا وتكەن الەمدىك كەزەڭگە جولداما العان. الەم چەمپيوناتىنىڭ قورىتىندىسى بويىنشا كوماندا ينجەنەريا، ديزاين، پرەزەنتاتسيا جانە قوعاممەن جۇمىس باعىتتارى بويىنشا بەرىلەتىن Inspire Award سىيلىعىنىڭ 3-ورنىن يەلەنگەن.
Stanford ۋنيۆەرسيتەتىندە ول Management Science & Engineering باعىتى بويىنشا ءبىلىم الۋدى جوسپارلاپ وتىر. بۇل باعدارلاما– تەحنولوگيالار، دەرەكتەردى تالداۋ جانە باسقارۋ سالالارىن بىرىكتىرەتىن پانارالىق باعىت.
