فوتو: Reuters
بولگاريالىق ءانشى دارا 516 بالل جيناپ، «ەۆروۆيدەنيە» ءان بايقاۋىنىڭ 70-ءشى مەرەيتويلىق كەزەڭىندە جەڭىسكە جەتتى. ول قازىلار القاسىنىڭ دا، كورەرمەندەر داۋىس بەرۋىنىڭ دە قورىتىندىسى بويىنشا ءبىرىنشى ورىنعا يە بولىپ، ەكىنشى ورىن العان يزرايلدىك ءانشى نوام بەتتاندى ارتتا قالدىردى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
بايقاۋ ناتيجەسىندە يزرايل كورەرمەندەر داۋىس بەرۋىندە 343 بالل جيناپ، ۇزاق ۋاقىت بويى كوش باسىندا تۇرعان. الايدا قازىلار القاسىنىڭ سوڭعى ناتيجەلەرى جاريالانعاننان كەيىن جالپى ەسەپتە بولگاريا العا شىقتى.
جەڭىمپاز دارا BBC-گە بەرگەن سۇحباتىندا ءوزىنىڭ «Bangaranga» اتتى ءانى ومىرگە دەگەن سەنىم مەن ءوپتيميزمدى بىلدىرەتىنىن اتاپ ءوتتى. ونىڭ ايتۋىنشا، ءاننىڭ نەگىزگى يدەياسى – ء«بارى مۇمكىن جانە ءبارى جاقسى بولادى» دەگەن ويدى جەتكىزۋ.
بيىلعى بايقاۋ اياسىندا ءيزرايلدىڭ قاتىسۋىنا بايلانىستى بىرقاتار ەلدەر «ەۆروۆيدەنيەگە» بويكوت جاريالادى. ولاردىڭ قاتارىندا يسپانيا، نيدەرلاند، يرلانديا، يسلانديا جانە سلوۆەنيا بار.
يزرايل اتىنان شىققان نوام بەتتان ساحناعا العاشقىلاردىڭ ءبىرى بولىپ شىعىپ، «Michelle» اتتى ءانىن ۇسىندى. اعىلشىن، فرانتسۋز جانە يۆريت تىلدەرىندە ورىندالعان كومپوزيتسيا كورەرمەندەر تاراپىنان ارالاس رەاكتسياعا يە بولدى: ءبىر بولىگى قولداۋ بىلدىرسە، ەندى ءبىر بولىگى نارازىلىق تانىتتى.
ۇلىبريتانيا بيىل سوڭعى ورىندى يەلەندى. سەم بەتتل (ساحنالىق اتى –Look Mum No Computer) تەك ۋكراينا قازىلار القاسىنان ءبىر بالل الىپ، كورەرمەندەر داۋىس بەرۋىنەن ءنول بالل جينادى. دەگەنمەن بۇل ۇلىبريتانيانىڭ بايقاۋداعى ەڭ ناشار ناتيجەسى ەمەس — 2021 جىلى ەل مۇلدە ۇپايسىز قالعان بولاتىن.
بيىلعى بايقاۋدىڭ باستى ءفاۆوريتى رەتىندە فيندىك دۋەت ليندا لامپەنيۋس پەن پەتە پارككونەن اتالدى. سونىمەن قاتار ۇزدىك ۇشتىككە گرەك ورىنداۋشىسى اكيلاس (اكيلاس ميتيلينەوس) جانە اۆستراليالىق ءانشى دەلتا گۋدرەم دە كىردى.
قورىتىندى ناتيجەدە فينليانديا التىنشى ورىنعا، اۆستراليا ءتورتىنشى ورىنعا، ال گرەتسيا ونىنشى ورىنعا تۇراقتادى.
