Фото: Reuters
Болгариялық әнші Дара 516 балл жинап, «Евровидение» ән байқауының 70-ші мерейтойлық кезеңінде жеңіске жетті. Ол қазылар алқасының да, көрермендер дауыс беруінің де қорытындысы бойынша бірінші орынға ие болып, екінші орын алған израильдік әнші Ноам Беттанды артта қалдырды, деп хабарлайды "Адырна" ұлттық порталы ВВС-ге сілтеп.
Байқау нәтижесінде Израиль көрермендер дауыс беруінде 343 балл жинап, ұзақ уақыт бойы көш басында тұрған. Алайда қазылар алқасының соңғы нәтижелері жарияланғаннан кейін жалпы есепте Болгария алға шықты.
Жеңімпаз Дара BBC-ге берген сұхбатында өзінің «Bangaranga» атты әні өмірге деген сенім мен оптимизмді білдіретінін атап өтті. Оның айтуынша, әннің негізгі идеясы – «бәрі мүмкін және бәрі жақсы болады» деген ойды жеткізу.
Биылғы байқау аясында Израильдің қатысуына байланысты бірқатар елдер «Евровидениеге» бойкот жариялады. Олардың қатарында Испания, Нидерланд, Ирландия, Исландия және Словения бар.
Израиль атынан шыққан Ноам Беттан сахнаға алғашқылардың бірі болып шығып, «Michelle» атты әнін ұсынды. Ағылшын, француз және иврит тілдерінде орындалған композиция көрермендер тарапынан аралас реакцияға ие болды: бір бөлігі қолдау білдірсе, енді бір бөлігі наразылық танытты.
Ұлыбритания биыл соңғы орынды иеленді. Сэм Бэттл (сахналық аты –Look Mum No Computer) тек Украина қазылар алқасынан бір балл алып, көрермендер дауыс беруінен нөл балл жинады. Дегенмен бұл Ұлыбританияның байқаудағы ең нашар нәтижесі емес — 2021 жылы ел мүлде ұпайсыз қалған болатын.
Биылғы байқаудың басты фавориті ретінде финдік дуэт Линда Лампениус пен Пете Паркконен аталды. Сонымен қатар үздік үштікке грек орындаушысы Акилас (Акилас Митилинэос) және австралиялық әнші Дельта Гудрем де кірді.
Қорытынды нәтижеде Финляндия алтыншы орынға, Австралия төртінші орынға, ал Греция оныншы орынға тұрақтады.
