2025 جىلدىڭ 1 قاڭتارىنان باستاپ بولگاريا مەن رۋمىنيا رەسمي تۇردە شەنگەن ايماعىنىڭ تولىققاندى مۇشەلەرى بولدى، دەپ حابارلايدى “ادىرنا” ۇلتتىق پورتالى Euronews.com سايتىنا سىلتەمە جاساپ.
ەندى بۇل ەلدەردىڭ قۇرلىق شەكارالارىندا تەكسەرۋلەر توقتاتىلىپ، ساياحاتشىلار مەن كولىك جۇرگىزۋشىلەرىنەن قۇجات كورسەتۋ تالاپ ەتىلمەيدى.
بولگاريا پرەمەر-ءمينيسترى ديميتار گلاۆچەۆ گرەكيامەن شەكارادا وتكەن سالتاناتتى راسىمدە بۇل وقيعانى ماڭىزدى جەتىستىك رەتىندە اتاپ ءوتتى.
«بۇل شەنگەن كەلىسىمىنە قاتىسۋشى ەلدەردىڭ شەكارالىق پوليتسياسى، اسكەرى جانە Frontex قىزمەتكەرلەرىنىڭ بىرلەسكەن جۇمىسىنىڭ ناتيجەسى. ەۋروپالىق وداقتىڭ سىرتقى شەكارالارىن تيىمدىرەك قورعاي الاتىنىمىزعا سەنىمدىمىن»، – دەدى پرەمەر-مينيستر.
بولگاريا مەن رۋمىنيا 2007 جىلى ەۋروپالىق وداققا مۇشە بولعانىمەن، شەنگەن ايماعىنا كىرۋ 18 جىلعا سوزىلدى. بۇل ۋاقىت ارالىعىندا ەۋروپا ەلدەرى زاڭسىز ميگراتسيا ماسەلەسىنەن قاۋىپتەنىپ، قوس ەلدى مۇشەلىككە قابىلداۋ شارتتارىن قاتاڭداتقان بولاتىن.
وتكەن جىلدىڭ ناۋرىز ايىندا بولگاريا مەن رۋمىنيا اۋەجايلارى مەن تەڭىز پورتتارىنداعى باقىلاۋلاردى الىپ تاستاسا، جەلتوقسان ايىندا قالعان شەكتەۋلەر تولىقتاي جويىلدى.
