كانادا ازاماتىنىڭ بىرىنەن اندەس شتاممىنداعى حانتاۆيرۋس انىقتالدى. ناۋقاس بۇعان دەيىن ۆيرۋس تىركەلگەن كرۋيزدىك كەمەدە ساپارلاعان. بۇل تۋرالى بريتاندىق كولۋمبيا پروۆينتسياسىنىڭ بيلىگى مالىمدەدى، دەپ حابارلايدى "ادىرنا".
رەسمي مالىمەتكە سايكەس، ناۋقاسقا قاتىستى زەرتحانالىق تەكسەرۋ بريتاندىق كولۋمبيا پروۆينتسياسىنداعى ۆيكتوريا قالاسىنىڭ اۋرۋحاناسىندا جۇرگىزىلگەن. تالداۋ ناتيجەسىندە حانتاۆيرۋسقا وڭ ناتيجە شىققانى بەلگىلى بولدى.
بريتاندىق كولۋمبيا بيلىگى جاعدايدى باقىلاۋدا ۇستاپ وتىرعانىن مالىمدەدى. ازىرگە ناۋقاستىڭ قازىرگى جاعدايى مەن ۆيرۋستىڭ ناقتى قالاي جۇققانى جونىندە تولىق اقپارات جاريالانعان جوق.
حانتاۆيرۋس — كوبىنە كەمىرگىشتەر ارقىلى تارالاتىن قاۋىپتى ينفەكتسيا. ال اندەس شتاممى — وڭتۇستىك امەريكادا كەزدەسەتىن حانتاۆيرۋستىڭ ءتۇرى. ماماندار بۇل ۆيرۋستىڭ سيرەك جاعدايدا ادامنان ادامعا جۇعۋى مۇمكىن ەكەنىن ايتادى.
قازىرگى ۋاقىتتا ەپيدەميولوگتار ناۋقاستىڭ بايلانىستا بولعان ادامدارىن انىقتاپ، قوسىمشا تەكسەرۋ جۇمىستارىن جۇرگىزۋدە. بيلىك وكىلدەرى تۇرعىنداردى سانيتارلىق تالاپتاردى ساقتاۋعا جانە دەنساۋلىقتاعى وزگەرىستەر بايقالعان جاعدايدا دارىگەرگە جۇگىنۋگە شاقىردى.
