اقتاۋ قالاسىندا تۇڭعىش رەت ۇيىمداستىرىلىپ جاتقان «كىتاپ كەرۋەن – اقتاۋ» جارمەڭكەسى ءوتىپ جاتىر.
كىتاپ جارمەڭكەسى اقتاۋ قالاسى اكىمدىگىنىڭ قولداۋىمەن، وبلىستىق قابيبوللا سىديىقۇلى اتىنداعى ماڭعىستاۋ وبلىستىق امبەباپ كىتاپحاناسىندا رەسمي تۇردە اشىلىپ، قالا قوناقتارى مەن تۇرعىندارى ءۇشىن ەسىگىن ايقارا اشتى.
مەرەكەلىك جارمەڭكەنىڭ العاشقى ءراسىمى قازاق ادەبيەتىنىڭ كورنەكتى تۇلعاسى، مەملەكەت جانە قوعام قايراتكەرى ءابىش كەكىلباەۆ ەسكەرتكىشىنە گۇل شوقتارىن قويۋدان باستالدى. سالتاناتتى شارانىڭ لەنتاسىن اقتاۋ قالاسىنىڭ اكىمى ابىلقايىر بايپاقوۆ پەن قر مەملەكەتتىك سىيلىعىنىڭ لاۋرەاتى، جازۋشى-دراماتۋرگ روزا مۇقانوۆا كەستى.
قالا اكىمى ابىلقايىر بايپاقوۆ شارا بارىسىندا قۇتتىقتاۋ ءسوز ايتىپ، مۇنداي كىتاپ جارمەڭكەسىنىڭ ەرەكشەلىگىن، كىتاپ وقيتىن ۇلتقا اينالۋدىڭ ماڭىزى مەن ءمانىن ءتۇسىندىردى.
تۇڭعىش رەت ءوتىپ جاتقان كىتاپ جارمەڭكەسىنە: جازۋشى-دراماتۋرگ، قر مەملەكەتتىك سىيلىقتىڭ لاۋرەاتى روزا مۇقانوۆا، اقىن، قر ەڭبەك سىڭىرگەن قايراتكەرى وڭايگۇل تۇرجان، اقىن، قر جازۋشىلار وداعى ماڭعىستاۋ فيليالىنىڭ ءتورايىمى انار شامشادينوۆا، اقىن، قر اقپارات سالاسىنىڭ ۇزدىگى گۇلايىم داۋىتباەۆا، جازۋشى، حالىقارالىق «شابىت» فەستيۆالىنىڭ لاۋرەاتى باقىتگۇل سارمەكوۆا، جازۋشى، قر مادەنيەت جانە اقپارات سالاسىنىڭ ۇزدىگى قانات تىلەۋحان، اقىن، جازۋشى اقبەرەن ەلگەزەك، اقىن، دراماتۋرگ ۇلاربەك نۇرعالىم سىندى الىس-جاقىننان كەلگەن قۇرمەتتى قوناقتار قاتىسىپ جاتىر.
بۇدان بولەك، ارنايى وسى كىتاپ جارمەڭكەسىنە ەلىمىزگە تانىمال باسپالار دا كەلدى. اتاپ ايتقاندا:
1. Qasym kitap
2. Steppe&World
3. اباي
4. ارمان-پۆ
5. ZIYAT
6. SANA
7. MAZMUNDAMA
8. Marfu
9. وتباسى حرەستوماتياسى
10. WIK HOUSE باسپالارى بار.
«كىتاپ كەرۋەن – اقتاۋ» جارمەڭكەسىنىڭ ارنايى دايىندالعان اۆتوبۋسى دا قالانى ارالاۋعا اتتاندى.
15-16 مامىر كۇندەرى ەكى كۇنگە جالعاساتىن جارمەڭكەدە كىتاپتارعا جەڭىلدىكتەر، ءتۇرلى شارالار جانە ادەبيەت پەن شىعارماشىلىق دامۋعا قاتىستى تاقىرىپتاردا ارنايى سەكتسيالىق وتىرىستار، جاڭا كىتاپتاردىڭ تانىستىرىلىمى مەن تۇساۋكەسەرلەر وتەدى.
