ديماش قۇدايبەرگەن مەن ونىڭ ءىنىسى، مۋزىكانت مانسۇر قۇدايبەرگەن «Voice Beyond Horizon» مۋزىكالىق رەاليتي-شوۋىنىڭ جاڭا شىعارىلىمىندا «سامعاۋ» اتتى جاڭا ءانىن تانىستىردى، دەپ حابارلايدى "ادىرنا" ۇلتتىق پورتالى.
باعدارلامانىڭ التىنشى شىعارىلىمى ۆوكاليستەردىڭ دۋەتتىك ونەر كورسەتۋىنە ارنالدى. شوۋدىڭ باس پروديۋسەرى ديماش قۇدايبەرگەن جوبا ءۇشىن ارنايى جازىلعان اۆتورلىق «سامعاۋ» كومپوزيتسياسىن ورىنداپ، ساحنادا وعان مانسۇر قۇدايبەرگەن ەلەكتروگيتارا پارتياسىمەن سۇيەمەلدەدى. اقىن جاراسحان نۇربايدىڭ سوزىنە جازىلعان تۋىندىدا تۋعان جەرگە دەگەن سۇيىسپەنشىلىك پەن بيىك ارماندارعا ۇمتىلۋ يدەياسى كورىنىس تاپقان.
كونتسەرتتىك باعدارلامانى قىتايلىق ورىنداۋشى لي يۋيگان اشىپ، تانىمال «新贵妃醉酒» («ماس بولعان حانىم») ءانىنىڭ جاڭا نۇسقاسىن ورىندادى. ءانشى ونەر كورسەتۋ الدىندا مۋزىكا حالىقتار مەن مادەنيەتتەردى بىرىكتىرەتىن كۇش ەكەنىن اتاپ ءوتتى.
سونىمەن قاتار قىتايدان كەلگەن قاتىسۋشىلار — وپەرا ءانشىسى تساي چەنيۋي مەن حالىق ۆوكاليستى لا دانچجۋ رەپ ەلەمەنتتەرى بار كروسسوۆەر فورماتىندا «山河图» («تاۋلار مەن وزەندەر كارتاسى») ءانىن ورىندادى. ولار بۇل تۋىندىنى تاڭداۋعا بوزجىرا شاتقالىنا جاساعان ساپارى ەرەكشە اسەر ەتكەنىن ايتتى.
يتاليا مەن قىرعىزستان ونەرپازدارى — دجۋليا فالكونە مەن نۇر چولپون «Nel blu, dipinto di blu» («Volare») كومپوزيتسياسىن ورىنداپ، ەكى ەل مادەنيەتىن ۇيلەستىرگەن ەرەكشە دۋەت كورسەتتى. ءاننىڭ ءبىر شۋماعى قىرعىز تىلىندە ورىندالدى.
ال نۇرجاس سادىرباەۆ پەن سەربيالىق ءانشى پرينتس «Tamo daleko» جانە «سامال تاۋ» اندەرىن بىرىكتىرىپ، اسەرلى دۋەت ۇسىندى. ديماش قۇدايبەرگەن ولاردىڭ ورىنداۋىن جوعارى باعالاپ، قىسقا ۋاقىت ىشىندە كۇردەلى شىعارمانى ورىنداۋ ۇلكەن جاۋاپكەرشىلىك ەكەنىن ايتتى.
باعدارلاما بارىسىندا مالايزيادان كەلگەن دجەريل لي مەن قىتايلىق چجان سينيۋ «鱼儿说» («بالىقتىڭ سىرى») اتتى ليريكالىق كومپوزيتسيانى ورىنداپ، تىڭدارمانداردىڭ ىقىلاسىنا بولەندى.
دۋەتتەر اراسىنداعى العاشقى سايىس قورىتىندىسى بويىنشا ءبىرىنشى ورىندى تساي چەنيۋي مەن لا دانچجۋ يەلەندى. ەكىنشى ورىن دجۋليا فالكونە مەن نۇر چولپون دۋەتىنە بۇيىرسا، ۇزدىك ۇشتىكتى نۇرجاس سادىرباەۆ پەن پرينتس تۇيىندەدى.
شوۋدىڭ كەلەسى كەزەڭى قازاقستاننىڭ ەڭ ءىرى قالالارىنىڭ ءبىرى — الماتىدا وتەدى. جوباعا قاتىسۋشى التى ەلدەن كەلگەن سەگىز ءانشى تيان-شان تاۋلارى باۋرايىنداعى اشىق ساحنادا ونەر كورسەتپەك.
