بۇگىن «كوكشە-ارەنا» سپورت كەشەنى ەڭ جاۋاپتى ماماندىق يەلەرىنىڭ باسىن قوسقان اۋقىمدى شارانىڭ ورتالىعىنا اينالدى. رەسپۋبليكالىق سپارتاكيادانىڭ سولتۇستىك ايماقتىق كەزەڭىنە اقمولا، قوستاناي جانە سولتۇستىك قازاقستان وبلىستارىنان مەملەكەتتىك اۋديتورلار كوماندالارى جينالدى. تۋرنير مەملەكەتتىك قارجىلىق باقىلاۋ ورگاندارىنىڭ 30 جىلدىعى مەن تەكسەرۋ كوميسسيالارىنىڭ قۇرىلعانىنا 15 جىل تولۋىنا وراي ۇيىمداستىرىلدى.
ءىس-شارانىڭ سالتاناتتى اشىلۋى اقمولا وبلىسى اكىمىنىڭ ءبىرىنشى ورىنباسارى ەلدوس رامازانوۆتىڭ قۇتتىقتاۋ سوزىمەن باستالدى. ول قاتىسۋشىلارعا ارناعان سوزىندە اۋديتورلاردىڭ ەڭبەگىنىڭ ماڭىزدىلىعىنا توقتالدى.
ء«ۇش ونجىلدىق ىشىندە مەملەكەتتىك اۋديت ينستيتۋتى بيۋدجەت قاراجاتىن ءتيىمدى پايدالانۋدىڭ سەنىمدى كەپىلىنە اينالدى. جۇمىستارىڭىزدىڭ جاۋاپكەرشىلىگىنە قاراماستان، سپورتقا ۋاقىت تاباتىندارىڭىز قۋانتادى. بۇل – كوماندالىق رۋحتى نىعايتۋدىڭ ەڭ ءتيىمدى جولى»، – دەپ اتاپ ءوتتى ەلدوس رامازانوۆ.
مەرەكەلىك كوڭىل كۇيدى اسەرلى كونتسەرتتىك باعدارلاما تولىقتىردى. ودان كەيىن قاتىسۋشىلار جارىستارعا كىرىستى. كوپشىلىك ءۇشىن بۇل تۋرنير سپورتتىق شەبەرلىكتى كورسەتۋ مۇمكىندىگى عانا ەمەس، تاجىريبە الماسىپ، كاسىبي بايلانىستى نىعايتاتىن ماڭىزدى الاڭعا اينالدى.
«بۇل سپارتاكيادا – كورشىلەس وڭىرلەردەگى ارىپتەستەرمەن تانىسىپ، جۇمىس بارىسىن بەيرەسمي جاعدايدا تالقىلاۋعا جانە سپورت ارقىلى جاقىنداسۋعا تاماشا مۇمكىندىك. ءبىز جارىسقا شامامەن ءبىر جارىم اي دايىندالدىق، ال كوماندامىزدىڭ ماقساتى – تەك جەڭىس»، – دەدى قاتىسۋشىلاردىڭ ءبىرى مۇرات راحىمجانوۆ.
ۇيىمداستىرۋشىلاردىڭ ايتۋىنشا، مەملەكەتتىك قىزمەتشىلەر اراسىندا مۇنداي اۋقىمدى شارانى وتكىزۋ مۇقيات ۇيلەستىرۋ مەن بارلىق دەتالگە ەرەكشە نازار اۋدارۋدى تالاپ ەتەدى.
«وسىنداي فورماتتاعى ءىس-شارا وبلىسىمىزدا العاش رەت وتكىزىلىپ وتىر. قاتىسۋشىلارعا ءساتتى ويىن جانە ەڭ باستىسى – جاراقاتسىز ونەر كورسەتۋدى تىلەيمىن. ءادىل باسەكەدە مىقتى جەڭىسكە جەتسىن»، – دەدى بۇقارالىق ۇلتتىق سپورت تۇرلەرىن دامىتۋ ينفراقۇرىلىمى ءبولىمىنىڭ باس مامانى نۇرسۇلتان تاسىباەۆ.
سپارتاكيادانىڭ العاشقى كۇنى تارتىستى ۆولەيبول ماتچتارى مەن زياتكەرلىك شاحمات پارتيالارىنا ارنالدى. ەرتەڭ، 15 مامىر كۇنى جانكۇيەرلەر شاعىن فۋتبول مەن ۇستەل تەننيسىنەن وتەتىن شەشۋشى كەزدەسۋلەردى تاماشالاي الادى. ايماقتىق كەزەڭ جەڭىمپازدارى رەسپۋبليكالىق سپارتاكيادانىڭ فينالىندا سولتۇستىك ءوڭىردىڭ نامىسىن قورعايدى.
