ازەربايجان سىرتقى ىستەر مينيسترلىگى ء(سىم) ارمەنيا استاناسى ەرەۆاندا فاكەل شەرۋىنە قاتىسۋشىلاردىڭ تۇركيا تۋىن جاعىپ جىبەرگەنىن قاتاڭ ايىپتادى. Report اگەنتتىگىنىڭ حابارلاۋىنشا، وسىعان بايلانىستى ءسىم مالىمدەمە جاسادى، دەپ حابارلايدى “ادىرنا”.
مالىمدەمەدە ارمەنيا ۇكىمەتى وسىنداي ناۋقاندى ۋاقىتىندا توقتاتىپ، ءتيىستى قاۋىپسىزدىك شارالارىن قامتاماسىز ەتۋى كەرەك ەكەنى اتاپ وتىلگەن، ويتكەنى مۇنداي ارەكەتتەر ەتنيكالىق جەككورۋشىلىكتىڭ كورىنىسى بولماق.
"دەموكراتيالىق نورمالار، جينالۋ جانە وي ەركىندىگى دەگەن سىلتاۋمەن مۇنداي قابىلدانبايتىن ارەكەتتەردى كوز جۇما قاراۋ مۇلدەم قولايسىز. بۇل ءىس-ارەكەتتەر رەۆانشيزم مەن ەتنيكالىق جەككورۋشىلىككە نەگىزدەلگەن فاشيستىك يدەولوگيانىڭ ايقىن كورىنىسى جانە حالىقارالىق دەڭگەيدە ايىپتالىپ، توقتاتىلۋى ءتيىس", — دەلىنگەن مالىمدەمەدە.
سونىمەن قاتار، ارمەنيا بيلىگىنەن بۇل وقيعاعا قاتىسى بار ادامداردى جاۋاپكەرشىلىككە تارتۋدى سۇرادى.
ارمەنيا پرەمەر-ءمينيسترى نيكول پاشينيان دا بۇل ارەكەتتى ايىپتادى.
«پرەمەر-مينيستر پاشينيان مۇنداي تاجىريبەنى ايىپتايدى. ونى جاۋاپسىز قالدىرۋعا بولمايدى. حالىقارالىق دەڭگەيدە مويىندالعان مەملەكەتتىڭ، اسىرەسە كورشىلەس ەلدىڭ تۋىن جاعۋ – انىق ارانداتۋشىلىق جانە شيەلەنىستى كۇشەيتەتىن ارەكەت»، – دەدى پرەمەر-ءمينيستردىڭ ءباسپاسوز حاتشىسى نازەلي باگداساريان.
ايتا كەتسەك، ءداستۇرلى فاكەل شەرۋى بەيسەنبى كەشىندە ەرەۆاندا وسمان يمپەرياسىنداعى ارميان گەنوتسيدى قۇرباندارىن ەسكە الۋ كۇنىنە وراي باستالعان. قاتىسۋشىلار رەسپۋبليكا الاڭىندا تۇركيا تۋىن ورتەگەن.
XIX عاسىردىڭ سوڭى – XX عاسىردىڭ باسىندا وسمان يمپەرياسى ارمياندارعا قارسى جۇيەلى قۋدالاۋ مەن قىسىم جاساعان. اتاپ ايتقاندا، 1915 جىلى كەيبىر تاريحشىلاردىڭ مالىمەتىنشە، 1,5 ميلليوننان استام ارميان قازا تاپقان. وسمان يمپەرياسىنداعى ارميان گەنوتسيدى فاكتىسىن 23 مەملەكەت، سونداي-اق ەۋروپارلامەنت پەن دۇنيەجۇزىلىك شىركەۋلەر كەڭەسى مويىنداعان.
