The New York Times باسىلىمى رەسەيدىڭ يرانعا اسكەري جانە كوممەرتسيالىق جۇكتەردى كاسپي تەڭىزى ارقىلى تاسىمالداپ جاتقانىن حابارلادى. گازەت مالىمەتىنشە، بۇل باعىت اقش قىسىمى كۇشەيگەن جاعدايدا تەگەراندى قولداۋدىڭ ماڭىزدى ارناسىنا اينالعان، دەپ حابارلايدى “ادىرنا”
«كاسپي تەڭىزى سانكتسيالار مەن اقش-تىڭ ورمۋز بۇعازىنداعى تەڭىز بلوكاداسىن اينالىپ وتەتىن ماڭىزدى دالىزگە اينالعان. اقش شەنەۋنىكتەرى رەسەي وسى باعىت ارقىلى دروندارعا ارنالعان بولشەكتەردى جەتكىزىپ جاتقانىن ايتادى»، دەلىنگەن باسىلىم جازباسىندا.
سونىمەن قاتار، رەسەيدەن جونەلتىلەتىن ازاماتتىق جۇكتەردىڭ كولەمى دە ارتقان. اسىرەسە بيداي، جۇگەرى جانە وسىمدىك مايى سەكىلدى نەگىزگى ازىق-تۇلىك ونىمدەرى يراننىڭ كاسپي جاعالاۋىنداعى ءتورت پورتى ارقىلى جەتكىزىلىپ جاتىر. باسىلىم مۇنى يراننىڭ سوعىس جاعدايىنداعى ازىق-تۇلىك قاۋىپسىزدىگىن ساقتاۋ ارەكەتىمەن بايلانىستىرادى.
The New York Times دەرەگىنە سايكەس، حالىقارالىق جەتكىزۋ ارنالارىنا تاۋەلدىلىكتى ازايتۋ يران ءۇشىن ستراتەگيالىق ماڭىزعا يە بولا باستاعان. سوندىقتان كاسپي باعىتى تەگەران ءۇشىن تەك ساۋدا جولى عانا ەمەس، سونىمەن قاتار ەكونوميكالىق تۇراقتىلىقتى ساقتاۋدىڭ ماڭىزدى تەتىگىنە اينالىپ وتىر.
ناۋرىز ايىندا تەگەرانعا قارسى سوعىس قيمىلدارى بارىسىندا يزرايل مەن اقش يرانننىڭ كاسپي تەڭىزى جاعالاۋىنداعى باندار-انزالي پورتتى قالاسىنا 2 رەت سوققى جاسادى. سوندا شاابۋىلدىڭ ماقساتى يران قورعانىس مينيسترلىگىنە باعىناتىن تەڭىز ورتالىعى ەكەندىگى ايتىلعان. سوققىلار تامدجيدي تەڭىز ورتالىعىن زاقىمداعان. بۇل ورتالىق تەڭىز ونەركاسىبى ۇيىمىنىڭ قۇرامىنا كىرەدى جانە اسكەري كەمەلەردى جوبالاۋ، ءوندىرۋ مەن جوندەۋمەن اينالىساتىن نەگىزگى ستراتەگيالىق نىسان بولىپ سانالادى.
ودان الدىن تساحال يراننىڭ كاسپي تەڭىزىندەگى اسكەري-تەڭىز كۇشتەرى مەن پورت ينفراقۇرىلىمىنا سوققى جاساعانىن مالىمدەگەن. اۋە كۇشتەرىنىڭ جويعىش ۇشاقتارى يران اسكەري فلوتىنىڭ نەگىزگى نىساندارىن نىساناعا العان. «پورت ينفراقۇرىلىمىنداعى ونداعان اسكەري كەمە ورنالاسقان وبەكتىلەرگە سوققى بەرىلدى. ولاردىڭ قاتارىندا زىمىراندىق كەمەلەر مەن كۇزەت كاتەرلەرى بار»، – دەلىنگەن سوندا تساحال تاراتقان مالىمەتتە.
28 اقپاننان باستاپ يزرايل مەن اقش يران اۋماعىنداعى بىرقاتار نىساندارعا، سونىڭ ىشىندە تەگەران قالاسىنا شابۋىل جاساپ كەلەدى. يران پرەزيدەنتى ماسۋد پەزەشكيان ەلدىڭ ەنەرگەتيكالىق جانە ستراتەگيالىق ينفراقۇرىلىمىنا جاسالعان شابۋىلداردى قاتاڭ ايىپتاعان. ونىڭ ايتۋىنشا، مۇنداي ارەكەتتەر جاعدايدى كۇردەلەندىرىپ، باقىلاۋدان تىس سالدارعا اكەلۋى مۇمكىن جانە ونىڭ اسەرى تەك ايماقپەن شەكتەلمەي، جاھاندىق دەڭگەيدە سەزىلۋى ىقتيمال.
