ازىلكەش نۇرلان سابۋروۆ رەسەيگە 50 جىلعا كىرۋگە تىيىم سالىنعاننان كەيىن، دۋباي قالاسىندا وتكەن كونتسەرتىندە رەسەيدە رەسمي قۇجات الۋعا تىرىسقانىن، الايدا ورىس ءتىلى بويىنشا تەستتەن وتە الماعانىن ايتتى، دەپ حابارلايدى “ادىرنا” پورتالى ريا نوۆوستيگە سىلتەپ.
سابۋروۆتىڭ كونتسەرتى 7 مامىر كۇنى Dubai Opera عيماراتىندا وتكەن.
“مەن رەسەيدىڭ كوشى-قون ساياساتىن قولدايمىن. رەسەيدە رەسمي قۇجات الۋعا تىرىستىم… نەگىزىنەن مۇنى سالىق ماسەلەسىنە بايلانىستى جاسادىم”، –دەدى سابۋروۆ.
كوميكتىڭ ايتۋىنشا، قۇجات الۋ ءۇشىن ورىس تىلىنەن تەست تاپسىرۋ قاجەت بولعان. ول ەمتيحاندى جۇبايىمەن بىرگە تاپسىرعان.
«ايەلىم ەكەۋمىز ءبىر پارتادا وتىردىق… سۇراقتار قيىن بولدى. مىسالى، ءرۋستىڭ شوقىندىرىلۋى قاشان بولعانى تۋرالى سۇرادى. ناتيجەسىندە ايەلىم ءوتتى، ال مەن وتە المادىم”، — دەدى ول.
كونتسەرت بارىسىندا سابۋروۆ كورەرمەندەردەن سوزدەرىن ۆيدەوعا تۇسىرمەۋدى بىرنەشە رەت سۇرادى. ونىڭ ايتۋىنشا، ايتىلعان پىكىرلەر كونتەكستەن جۇلىنىپ الىنۋى مۇمكىن.
رەسەيگە كىرۋگە تىيىم سالىنعاننان كەيىن قاڭتار ايىندا سابۋروۆ تۋعان جەرى – قازاقستانعا ورالعان. سونىمەن قاتار، قازاقستان رەسپۋبليكاسى ۇلتتىق قاۋىپسىزدىك كوميتەتى كوميككە قاتىستى تەكسەرۋ باستالعانىن حابارلادى. الايدا تەكسەرۋدىڭ ناقتى قاي باپ بويىنشا جۇرگىزىلىپ جاتقانى ازىرگە جاريالانعان جوق.
