جەلىدە ازىلكەش نۇرلان سابۋروۆتىڭ «ۆاگنەر لەگيونى يسترا» بولىمشەسىنىڭ جاۋىنگەرلەرىنە 10 پيتبايك سىيلادى دەگەن اقپارات كەڭ تاراعاننان كەيىن، بۇل وقيعاعا قاتىستى بەينەجازبالار وشىرىلگەن، دەپ حابارلايدى "ادىرنا" ۇلتتىق پورتالى.
باق مالىمەتىنشە، اتالعان بەينەنى 2025 جىلعى 7 شىلدەدە يسترا مۋنيتسيپالدىق وكرۋگىنىڭ باسشىسى تاتيانا ۆيتۋشەۆا جاريالاعان. جازبا ۇزاق ۋاقىت بويى ونىڭ جەكە پاراقشاسىندا جانە وكرۋگتىڭ Telegram-ارناسىندا تۇرعان. الايدا سابۋروۆقا قاتىستى سىن قايتا كۇشەيگەن سوڭ، بەينە الدىمەن جەكە اككاۋنتتان، كەيىن اۆتوماتتى تۇردە مۋنيتسيپاليتەت ارناسىنان دا وشىرىلگەن.
بۇل ماسەلە سابۋروۆقا رەسەيگە 50 جىلعا كىرۋگە تىيىم سالىنعانى تۋرالى اقپاراتتان كەيىن قايتا تالقىلانا باستادى. كەي دەرەكتەرگە سايكەس، وعان قاتىستى شەشىم ۇلتتىق قاۋىپسىزدىك مۇددەسى نەگىزىندە قابىلدانعان.
سونداي-اق كەيبىر اقپارات كوزدەرى بۇرىن جاريالانعان ۆيدەودا كوميكتىڭ «ۆاگنەر لەگيونى يسترا» بولىمشەسىنە 10 موتوتسيكل بەرگەنى ايتىلعانىن حابارلايدى.
تىيىم سالۋ تۋرالى حابارلامانى سابۋروۆ ماسكەۋدەگى ۆنۋكوۆو اۋەجايىنا ۇشىپ كەلگەن كەزدە العان. كەيىن ول الماتىعا ۇشىپ كەتكەن. ازىلكەش جاعدايعا اشىق پىكىر بىلدىرمەي، ماسەلەنى زاڭگەرلەر قارايتىنىن ايتقان. ول تەك جەكە ومىرىنە قۇرمەتپەن قاراۋدى سۇراپ، «ۋاقىت ءبارىن ءوز ورنىنا قويادى» دەپ مالىمدەگەن.
سوڭعى ۋاقىتتا سابۋروۆ Instagram-داعى بارلىق جازبالارىن دا وشىرگەن.
