جەزقازعاندا مەتاللۋرگ كۇنىنە ارنالعان مەرەكەلىك ءىس-شارا كورنەكتى عالىم، قازاقستان عىلىم اكادەمياسىنىڭ تۇڭعىش پرەزيدەنتى قانىش ساتباەۆتىڭ ەسكەرتكىشىنە گۇل شوعىن قويۋ راسىمىمەن باستالدى.
سالتاناتتى راسىمگە ۇلىتاۋ وبلىسىنىڭ اكىمى ەسەت بايكەن، ۇلتتىق قۇرىلتاي مۇشەسى، ەڭبەك ارداگەرى تولەگەن بۇكىروۆ، «قازاقمىس كورپوراتسياسى» جشس باقىلاۋ كەڭەسىنىڭ توراعاسى نۇرمۇحامبەت ابدىبەكوۆ، باسقارما توراعاسى رۋسلان وسكەنالى، مەتاللۋرگيا جونىندەگى باس وپەراتسيالىق ديرەكتور ءارى «Kazakhmys Smelting (قازاقمىس سمەلتينگ)» جشس باس ديرەكتورى جانىبەك بايعابەلوۆ، ءوڭىر باسشىلىعى، ەڭبەك ۇجىمدارىنىڭ وكىلدەرى مەن سالا ارداگەرلەرى قاتىستى.
قاتىسۋشىلار قازاقستاننىڭ تاۋ-كەن مەتاللۋرگياسى سالاسىنىڭ قالىپتاسۋىنا جانە جەزقازعان ءوڭىرىنىڭ مينەرالدىق رەسۋرستارىن عىلىمي تۇرعىدان زەرتتەۋگە ولشەۋسىز ۇلەس قوسقان قانىش ساتباەۆتىڭ رۋحىنا تاعزىم ەتىپ، ەسكەرتكىشىنە گۇل شوقتارىن قويدى.
ءراسىم بارىسىندا قانىش ساتباەۆتىڭ جەزقازعاننىڭ ءىرى مىس كەن ورىندارىن عىلىمي نەگىزدە دالەلدەپ، ولاردىڭ وندىرىستىك الەۋەتىن اشۋداعى ەڭبەگى ەرەكشە اتالىپ ءوتتى. ونىڭ زەرتتەۋلەرى ءوڭىردىڭ الەمدەگى جەتەكشى مىس ءوندىرۋ ورتالىقتارىنىڭ بىرىنە اينالۋىنا نەگىز قالادى.
ۇيىمداستىرۋشىلاردىڭ ايتۋىنشا، گۇل شوعىن قويۋ ءراسىمى وتاندىق مەتاللۋرگيا تاريحىنا دەگەن قۇرمەتتىڭ جانە سالانىڭ ەڭبەك ءداستۇرىن جالعاستىرىپ كەلە جاتقان ۇرپاق ساباقتاستىعىنىڭ ايقىن كورىنىسى بولدى.
