قاراعاندى وبلىسىندا ۇلى وتان سوعىسىنداعى جەڭىستىڭ 80 جىلدىعىنا ارنالعان «مەنىڭ جەڭىس تاريحىم» پاتريوتتىق ونلاين-اكتسياسى باستالىپ، وبلىس تۇرعىندارى، وقۋشىلارى جانە جاستارى الەۋمەتتىك جەلىلەردە بەلسەندىلىك تانىتۋدا. ولار سوعىسقا قاتىسقان تۋىستارىنىڭ جانە تىل ەڭبەككەرلەرىنىڭ سۋرەتتەرىمەن بەلسەندى تۇردە ءبولىسىپ، ولاردى قىسقاشا وتباسىلىق اڭگىمەلەرىمەن، ەستەلىكتەرىمەن جانە مۇراعاتتىق سۋرەتتەرىمەن جاريالاۋدا.
قاراعاندى قالاسىنىڭ تۇرعىنى اليا يسكاكوۆا ءوزىنىڭ اتاسىنىڭ ءومىر بايانى تۋرالى قىسقاشا اقپاراتپەن ءبولىستى: «يسكاكوۆ احمەتجان يسكاكوۆيچ جەزقازعان وبلىسى، اقادىر اۋدانىنىڭ وسپەن كەنتىندە 1920 جىلى تۋعان. 1940 جىلى اسكەر قاتارىنا شاقىرىلدى. قورشاۋداعى لەنينگرادتى بوساتۋعا قاتىستى. قىزى ارميانىڭ اتقىشتار ۆزۆودىندا بولعان. ءىى دارەجەلى وتان سوعىسى وردەنىمەن ماراپاتتالعان. 1943 جىلى سوعىستا العان كونتۋزياعا بايلانىستى بوساتىلدى. بوساتىلعاننان كەيىن كەيىن مۇعالىم بولىپ جۇمىس ىستەپ، مەكتەپتە الگەبرا، گەومەتريا جانە فيزيكا پاندەرىنەن ساباق بەردى».
الەۋمەتتىك جەلىنىڭ ءبىر قولدانۋشىسى ءمولدىر ەربولاتقىزى اتاسىنىڭ اعاسى تۋرالى اڭگىمەلەپ بەردى: «مەنىڭ اتام، ديۋسەمباەۆ ەرشورا — ەرلىكتىڭ، نامىستىڭ جانە تۋعان جەرگە دەگەن ادالدىقتىڭ ۇلگىسى. 1941 جىلدىڭ شىلدەسىندە مايدانعا اتتانىپ، ۇلى وتان سوعىسىنىڭ اۋىر كۇندەرىندە ەلى مەن جەرىن ەرلىكپەن قورعادى. كۋرسك تۇبىندەگى جانە حاركوۆ ءۇشىن شايقاستاردا اسقان باتىرلىق تانىتقانداردىڭ ءبىرى. «كاتيۋشا» ارتيللەريالىق قوندىرعىسىنىڭ كومانديرى رەتىندە جاۋعا قارسى قايمىقپاي شايقاستى. 1943 جىلى قازان ايىندا اياعىنان اۋىر جاراقات العانىنا قاراماستان، رۋحى سىنبادى. ونىڭ ەرلىگى «داڭق» وردەنىمەن، «وتان سوعىسى» وردەنىمەن جانە «ەرەن ەڭبەگى ءۇشىن» مەدالىمەن ماراپاتتالدى».
ۇلى وتان سوعىسى جىلدارىندا قاراعاندى وبلىسىنان مايدانعا 45 مىڭعا جۋىق ادام اتتاندى. ولاردىڭ 18 مىڭعا جۋىعى تۋعان جەرىنە ورالمادى. الايدا ولاردىڭ ارقايسىسىنىڭ ەرلىگى مەن جانقيارلىعى ۇرپاق جۇرەگىندە ماڭگى ساقتالادى.
ەرەن ەرلىگى مەن قايسارلىعى ءۇشىن 18 قاراعاندىلىق جاۋىنگەرگە كەڭەس وداعىنىڭ باتىرى اتاعى بەرىلدى. ال 6587 سارباز وردەندەر مەن مەدالدارمەن ماراپاتتالىپ، ەل تاريحىندا وشپەس ءىز قالدىردى.
«مەنىڭ جەڭىس تاريحىم»— بۇل جاي عانا اكتسيا ەمەس، بۇل اتا-بابالارىمىزدىڭ ەرلىگىنە دەگەن شىنايى قۇرمەت.
بۇل باستاما ارقىلى ءبىز ءار وتباسىنىڭ جەڭىس جولىن ەسكە ءتۇسىرىپ، سوعىس جىلدارىنداعى باتىرلىق پەن تاباندىلىقتى جاڭعىرتامىز. ءاربىر ەستەلىك — بۇل ۇرپاقتار اراسىنداعى بايلانىس، ماقتانىش پەن رۋحتىڭ كورىنىسى.
