فوتو: instagram.com/sanabishev
لوندوننىڭ بەلگىلى اۋداندارىنىڭ ءبىرى سەنت-دجەيمس (St. James’s) باسشىلىعىنا قازاق جىگىتى سانجار ابىشەۆ كەلدى. ۇلىبريتانيانىڭ كونسەرۆاتيۆتىك پارتياسىنىڭ اتىنان تۇسكەن قانداسىمىز سايلاۋدا ايقىن باسىمدىقپەن جەڭىسكە جەتتى، دەپ حابارلايدى "ادىرنا".
سايلاۋ قورىتىندىسى بويىنشا، سانجار ابىشەۆ 2,3 مىڭ داۋىستىڭ ىشىنەن ءوز قارسىلاسىنان 350 داۋىس ارتىق جيناپ، باسىپ وزدى. بۇل تۋرالى تانىمال قازاقستاندىق بيزنەسمەن، Kusto Group نەگىزىن قالاۋشىلاردىڭ ءبىرى قانات كوپباەۆ الەۋمەتتىك جەلىدەگى پاراقشاسىندا حابارلادى
«بريتاندىق ەليتا اراسىندا ەشقانداي تانىس-تامىرسىز، تەك ءبىلىمى، ءتارتىبى جانە كوپجىلدىق ەڭبەگى ارقىلى لوندوننىڭ مارتەبەلى اۋدانىنىڭ مەرى اتاندى. بۇل ونىڭ ۇلكەن جولىنىڭ باسى عانا ەكەنىنە سەنىمدىمىن»، – دەپ اتاپ ءوتتى قانات كوپباەۆ.
ايتا كەتسەك، سانجار ابىشەۆ – كاسىپكەر ازات ابىشەۆتىڭ ۇلى. ول مەكتەپ جاسىنان باستاپ ۇلىبريتانيادا تۇرىپ، ءبىلىم العان. سانجار بەدەلدى Malvern College كوللەدجى مەن ۋنيۆەرسيتەتتى تامامداعان. 2016 جىلدان باستاپ ءىرى برەندتەرمەن جۇمىس ىستەيتىن Blue Swallow Group ماركەتينگتىك اگەنتتىگىن باسقارادى.
2015 جىلى الەۋمەتتىك جوبالاردى قولدايتىن جەكە قايىرىمدىلىق قورىن قۇرعان. ساياسي ارەناعا 2022 جىلدان باستاپ بەلسەندى ارالاسا باستادى. 2024 جىلى سەنت-دجەيمس وكرۋگى بويىنشا كونسەرۆاتيۆتىك پارتيانىڭ توراعاسى بولىپ سايلانعان.
