لوندوندا ۋلتراوڭشىل بەلسەندى توممي روبينسون ۇيىمداستىرعان مارشقا 150 مىڭعا جۋىق ادام جينالدى. سونىمەن قاتار قالادا ناسىلشىلدىككە قارسى نارازىلىق شەرۋى دە ءوتتى. روبينسون جاقتاستارىنىڭ مارشى تارتىپسىزدىككە ۇلاسىپ، قاقتىعىستار كەزىندە 26 پوليتسيا قىزمەتكەرى جاراقات الدى. بۇل تۋرالى ۆۆس جازدى، دەپ حابارلايدى “ادىرنا”
«بىرىككەن كورولدىكتى بىرىكتىرەيىك»ۇرانىمەن وتكەن دەمونستراتسيا ۋايتحولل كوشەسىنە دەيىن جەتتى. بۇل كوشە – ۇلىبريتانيانىڭ نەگىزگى ۇكىمەت مەكەمەلەرى ورنالاسقان ايماق. نارازىلىق كەزىندە بىرنەشە سپيكەر ءسوز سويلەدى، ولاردىڭ قاتارىندا اقش-تان كەلگەن پودكاستەر، ساياسي بەلسەندى جانە دونالد ترامپتىڭ بۇرىنعى كەڭەسشىسى ستيۆ بەننون، سونداي-اق ۆيدەوبايلانىس ارقىلى سويلەگەن امەريكالىق تەحنولوگيالىق ماگنات يلون ماسك بولدى.
بريتانيا استاناسىنىڭ باسقا بولىگىندە «فاشيزمگە قارسى مارش» اياسىندا 5 مىڭعا جۋىق ادام جينالدى. بۇل شەرۋدى Stand Up To Racism («ناسىلشىلدىككە قارسى تۇرايىق») توبى ۇيىمداستىردى.
لوندون پوليتسياسىنىڭ مالىمدەۋىنشە، روبينسوننىڭ جاقتاستارى ءتارتىپ ساقشىلارىنا قارسى «قابىلداۋعا بولمايتىن زورلىق-زومبىلىق» كورسەتكەن. پوليتسەيلەرگە شىنى بوتەلكەلەر، فەيەرۆەركتەر جانە باسقا دا زاتتار لاقتىرىلعان.
ۇلىبريتانيانىڭ ىشكى ىستەر ءمينيسترى شابانا ماحمۋد پوليتسەيلەرگە شابۋىل جاساعانداردى قاتاڭ ايىپتادى.
«قىلمىستىق ارەكەتكە بارعان ءاربىر ادام زاڭ بويىنشا تولىق جاۋاپقا تارتىلادى»، دەدى ول.
