Kökşetaudaǧy «Jaǧalau» alaŋynda Otan qorǧauşy künıne arnalǧan saltanatty şara ötıp, oǧan myŋdaǧan tūrǧyn jinaldy. Patriottyq ruh pen ūrpaqtar sabaqtastyǧyn därıptegen mereke aiasynda küştık qūrylymdardyŋ körsetılımderı ūiymdastyrylyp, ardagerlerge qūrmet körsetıldı, sondai-aq jastar respublikalyq qozǧalys qataryna qabyldandy.
Saltanatty jiyndy Aqmola oblysy äkımınıŋ orynbasary Eldos Ramazanov aşty. Ol öz sözınde būl merekenıŋ tek Qaruly küşterdıŋ quatyn aiqyndap qana qoimai, erlık pen Otanǧa adal qyzmetke negızdelgen memlekettık qūndylyqtardyŋ maŋyzyn körsetetının atap öttı.
– Otan qorǧau – är azamattyŋ qasiettı boryşy ärı zor märtebesı. Bügınde Ädılettı Qazaqstandy qūru jolynda äskeri qyzmetşı men küştık qūrylym ökılı käsıbilık pen adaldyqtyŋ ülgısın körsetıp keledı. Aqmolalyqtardyŋ el qorǧanysyn nyǧaituǧa jäne azamattardyŋ qauıpsızdıgın qamtamasyz etuge qosyp otyrǧan ülesı zor, – dedı Eldos Ramazanov.
Is-şara aiasynda marapattau räsımı öttı. Mınsız qyzmetı men äskeri-patriottyq tärbiege qosqan ülesı üşın öŋırdıŋ bırqatar ofiserı men ardagerıne vedomstvolyq medaldar men oblys äkımınıŋ alǧys hattary tabystaldy.
Aqmola oblysy qorǧanys ısterı jönındegı departamentı bastyǧynyŋ orynbasary, polkovnik Qanat Omarov jinalǧandardy merekemen qūttyqtap, el qorǧany boludyŋ jauapkerşılıgıne toqtaldy.
– Barşaŋyzdy Otan qorǧauşy künımen şyn jürekten qūttyqtaimyn. Sızge zor densaulyq, amandyq, aşyq aspan tıleimın. Ardagerdıŋ daŋqty jolyn jalǧastyryp, eldıŋ naǧyz qorǧauşysy bola bıleiık, – dedı ol.
Keştıŋ äserlı sätterınıŋ bırı – jas kokşetaulyqtyŋ ant qabyldau räsımı boldy. Onda ondaǧan oquşy «Jas Ūrpaq» balalar-jasöspırımder ūiymynyŋ qataryna qabyldandy.
Merekelık şara oblystyq Ükılı Ybyrai atyndaǧy filarmoniia ärtısterınıŋ konserttık baǧdarlamasymen qorytyndylandy. «Gäkku» ansamblınıŋ bi qoiylymy men «Ainaköl» folklorlyq ūjymynyŋ etno-äuenı änşıler Janat Esov, Altynbek Bektemır jäne Amanǧali Jūmataevtyŋ önerımen üilesım tapty. Şara soŋynda oryndalǧan «Atameken» änı körermennıŋ boiynda elge degen maqtanyş pen beibıt bolaşaqqa degen senım sezımın küşeittı.
