تۇركيا پرەزيدەنتى رەجەپ تايپ ەردوعان باكۋمەن وتكەن كەلىسسوزدەردەن كەيىن فرانتسيا پرەزيدەنتى ەممانيۋەل ماكروننىڭ ارمەنيادان تۇركياعا قۇرلىق شەكاراسى ارقىلى وتۋىنە رۇقسات بەرمەدى. بۇل تۋرالى ازەربايجاندىق AZfront Telegram-ارناسى جازدى، دەپ حابارلايدى «ادىرنا» ءتىلشىسى.
3–5 مامىر كۇندەرى ءتۇرلى ءىس-شارالارعا قاتىسۋ ءۇشىن ەرەۆانعا بارعان ماكرون ارمەنيادان تۇركياعا جابىق قۇرلىق شەكاراسى ارقىلى ءوتىپ، ەردوعانمەن كەزدەسۋدى جوسپارلاعان. بۇل قادام «ساياسي سيمۆولدىق يشارا» رەتىندە قاراستىرىلعان.
باسىلىمنىڭ بىرنەشە دەرەككوزىنە سۇيەنسەك، ساپار تۇركيا تاراپىنىڭ جەكەلەگەن وكىلدەرىمەن الدىن الا كەلىسىلگەن. الايدا ماسەلە تۇركيا باسشىسىنىڭ دەڭگەيىنە شىققاندا، ستراتەگيالىق وداقتاس ازەربايجانمەن تالقىلاۋدان كەيىن ەردوعان ماكرونعا رۇقسات بەرمەگەن.
«30 جىلدان استام ۋاقىت بويى جابىق تۇرعان تۇرىك-ارميان شەكاراسى ارقىلى فرانتسيا پرەزيدەنتىنىڭ ءوتۋى ءۇشىنشى تاراپتىڭ قاتىسۋىمەن ەكىجاقتى كوممۋنيكاتسيالاردىڭ اشىلۋىنىڭ بۇرىن-سوڭدى بولماعان مىسالىنا اينالار ەدى. افريكا مەن تاياۋ شىعىستاعى ىقپالىن جوعالتىپ، يزرايلمەن قارىم-قاتىناسىن ناشارلاتىپ، ۋكراينا باعىتىندا دا ناتيجەگە جەتە الماعان ماكروننىڭ بۇل جۇزەگە اسپاعان ارەكەتى ءپاريجدىڭ گەوساياسي امبيتسياسى مەن حالىقارالىق ارەناداعى ناقتى ىقپالى اراسىنداعى الشاقتىقتى تاعى ءبىر مارتە كورسەتتى»، — دەپ جازادى باسىلىم.
سونداي-اق ماقالادا Le Journal du Dimanche گازەتىنىڭ «ماكرون تۇسىندا فرانتسۋز ديپلوماتياسى ءوز ماڭىزىن جىلدام جوعالتىپ جاتىر» اتتى ماتەريالى مىسال رەتىندە كەلتىرىلگەن.
وسى جاعداي اياسىندا تۇركيانىڭ ارمەنيامەن قاتىناستى قالىپقا كەلتىرۋ جونىندەگى ارنايى وكىلى سەردار كىلىچءتىڭ مالىمدەمەلەرى دە رەزونانس تۋدىردى. ول «ەرەۆاندا ءوزىن ۇيىندەگىدەي سەزىنەتىنىن» جانە ارميان ارىپتەسى رۋبەن رۋبينيانمەن كەلىسسوزدەر كەزىندە «تۇركيانىڭ ەمەس، ارميان حالقىنىڭ مۇددەسىن باسشىلىققا العانىن» ايتقان.
ازەربايجاندىق باق ونىڭ بۇل ريتوريكاسى تۇركيا بيلىگىنىڭ رەسمي ۇستانىمىنا قايشى كەلەتىنىن جانە ۇلتتىق مۇددەدەن اۋىتقۋ رەتىندە قابىلدانۋى مۇمكىن ەكەنىن اتاپ ءوتتى.
