ارمەنيانىڭ دەنساۋلىق ساقتاۋ ءمينيسترى ارسەن توروسيان كوشەگە شىعىپ، ءوتىپ بارا جاتقان ادامدارعا بەتپەردە (ماسكا) تاراتتى. بۇل تۋرالى www.panorama.am/ru پورتالى اقپارات جاريالادى.
ەرەۆاننىڭ شەنگاۆيت اكىمشىلىك اۋدانىندا جولاي كەزدەسكەن تۇرعىنداردىڭ ارقايسىسىنا بەتپەردە بەرگەن دەنساۋلىق ساقتاۋ ءمينيسترى ىندەت جايلاعان كەزەڭدە بۇل اكتسيانىڭ ءسال دە بولسا پايداسى تيەتىنىن ايتتى.
–بۇگىن ءبىز كوشەگە شىعىپ، حالىققا بەتپەردە تاراتامىز. ەل از دا بولسا مۇنىڭ پايداسى بولاتىنىن ءتۇسىنۋى ءتيىس. سوندىقتان دا بۇل اتسيانى حالىقتىڭ قاۋىپسىزدىگى ءۇشىن ۇيىمداستىرىپ وتىرمىز،- دەدى ارسەن توروسيان فەيسبۋكتە جازعان جازباسىندا.
بۇل شارا ءبىرىنشى رەت جاسالىنىپ وتىرعان جوق. وسىدان ءبىرشاما ۋاقىت بۇرىن ارمەنيانىڭ پرەمەر-ءمينيسترى نيكول پاشينيان حالىق كوپ جۇرەتىن اۋداندا تۇرعىندارعا بەتپەردە تاراتقان. ەندى مىنە بۇل اكتسيانى قالعان شەنەۋنىكتەر جالعاستىرىپ اكەتتى.
ەرەۆاننىڭ بىرنەشە اۋدانىندا بۇگىن ەلدىڭ ۆيتسە-پرەمەرى مگەر گريگوريان، پوليتسيا باسشىسى ۆاگە كازاريان، پرەمەر-ءمينيستردىڭ اپپارات جەتەكشىسى ەدۋارد اگادجانيان، سىرتقى ىستەر ءمينيسترى زوگراب مناتساكانيان، ينفراقۇرىلىم جانە اۋماقتىق باسقارۋ ءمينيسترى سۋرەن پاپيكيان، ەڭبەك جانە الەۋمەتتىك ماسەلەلەر جونىندەگى مينيستر زارۋي باتويان جانە تاعى باسقا شەنەۋنىكتەر حالىققا بەتپەردە تاراتتى.
ەسكەرتە كەتەيىك، كوروناۆيرۋس ارمەنيادا دا ءورشىپ تۇر. بۇگىنگى كۇنگە دەيىن اتالعان اتى جامان ىندەتتەن اۋىرىپ جاتقانداردىڭ سانى ەلدە 21717 ادامعا جەتتى. 10797 ادام بۇل اۋرۋدان جازىلىپ شىقتى. ال 516 ادام كوروناۆيرۋستان قايتىس بولدى.
ەركىن قالدان، «ادىرنا» ۇلتتىق پورتالى
سىلتەمەدەن ۆيدەوسىن تاماشالاۋعا بولادى.
