جامبىل وبلىسى مەركى اۋدانىنداعى قىزىلساي اۋىلىندا «قارا كەمپىر» اتانعان «قالي اپا مۋزەي-ءۇيى» سالتاناتتى تۇردە اشىلدى، دەپ حابارلايدى "ادىرنا" ۇلتتىق پورتالى.
بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
ءىس-شارا قالي انانىڭ ءومىر جولىنان سىر شەرتەتىن ساحنالىق قويىلىممەن باستالىپ، جينالعان كوپشىلىككە ەرەكشە اسەر سىيلادىسالتاناتتى جيىنعا اۋدان اكىمى ەربول جيەنقۇلوۆ، قازاقستاننىڭ حالىق ارتىستەرى التىنبەك قورازباەۆ مەن تۇڭعىشباي جامانقۇلوۆ، سونداي-اق وبلىستىق مادەنيەت باسقارماسىنىڭ باسشىسى ەرلان ءجۇنىسباي جانە سوت سالاسىنىڭ ارداگەرى مۇسابەك الىمبەكوۆ قاتىستى. سونىمەن قاتار، قر ەڭبەك سىڭىرگەن قايراتكەرى، زەرگەر-رەستاۆراتور بەرىك الىباەۆ، قىرعىز رەسپۋبليكاسىنان كەلگەن دەلەگاتسيا جانە اۋىل تۇرعىندارى شاراعا كۋا بولدى.
جيىندا قالي اناعا ارنالعان ەسكەرتكىشتىڭ ورناتىلۋىنا باستاماشى بولعان التىنبەك قورازباەۆ پەن مۋزەيدى قالپىنا كەلتىرۋگە ۇلەس قوسقان بەرىك الىباەۆتىڭ ەڭبەگى ەرەكشە اتالىپ ءوتتى. اۋدان باسشىسى اتالعان ازاماتتارعا «مەركى اۋدانىنا سىڭىرگەن ەڭبەگى ءۇشىن» بەلگىسىن تابىستادى.
شارا بارىسىندا ءسوز سويلەگەن قوناقتار قالي انانىڭ تاعدىرىن ۇلىقتاۋ – تاريحي جادىنى جاڭعىرتۋدىڭ ماڭىزدى بولىگى ەكەنىن اتاپ ءوتتى. ءىس-شارا سوڭىندا قاتىسۋشىلار مۋزەي اۋلاسىنداعى ەكىنشى دۇنيەجۇزىلىك سوعىس ەسكەرتكىشىنە گۇل شوقتارىن قويىپ، جاڭارتىلعان مۋزەي ەكسپوزيتسياسىمەن تانىستى.
ايتا كەتەيىك، سوعىسقا اتتانعان جەكسەنقۇل، قوسشىعۇل اتتى قوس ۇلىنان قاتار ايىرىلعان قالي انانىڭ ىشقۇسا بولعان انانىڭ زارى مەن كۇيىگىنەن «قارا كەمپىر» ءانى تۋادى. كەيىننەن «قارا كەمپىر» ءانىنىڭ كەيىپكەرىنە ەسكەرتكىش تۇرعىزىلادى.
سوعىستان قايتپاي قالعان قوس ۇلىنىڭ جولىنا تەلمىرۋىمەن وتكەن اناعا ارنالعان مەموريالدىق كەشەننىڭ بيىكتىگى 4 مەتردى قۇرايدى. بەتوننان قۇيىلعان ءتورتبۇرىش تۇعىردىڭ ۇستىنە ورناتىلعان.
