«جارىق جۇرەكتە – نۇرلى الەم» تاقىرىبىندا تولىقتىرۋ شاراسى ءوتتى

جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ ۇيىمداستىرۋىمەن قورداي جانە شۋ اۋداندارىندا «تيفلومۋزەي» جوباسى اياسىندا زاعيپ جانە كورۋ قابىلەتى تومەن ازاماتتارعا ارنالعان تانىمدىق تولىقتىرۋ شارالارى ءوتتى. اتالعان ءىس-شارالار تاريحي-مادەني مۇرالاردى ەرەكشە قاجەتتىلىگى بار ازاماتتارعا قولجەتىمدى ەتۋ، جادىگەرلەردى قولمەن ۇستاپ سەزىنۋ ارقىلى تانىم كوكجيەگىن كەڭەيتۋ ماقساتىندا ۇيىمداستىرىلدى.
     
قورداي اۋدانىنداعى كەنەن ازىرباەۆ اتىنداعى قورداي اۋداندىق ادەبي-مەموريالدىق مۋزەيى بازاسىندا «قولىڭمەن ۇستاپ، جۇرەكپەن سەزىن!» تانىمدىق بۇرىشى بويىنشا «جارىق جۇرەكتە – نۇرلى الەم» تاقىرىبىندا تولىقتىرۋ شاراسى وتكىزىلدى. شارا بارىسىندا قازاقتىڭ ايگىلى حالىق اقىنى، جىراۋ، ءانشى-كومپوزيتورى، قازاقستاننىڭ ەڭبەك سىڭىرگەن ونەر قايراتكەرى كەنەن ازىرباەۆتىڭ ءومىرى مەن شىعارماشىلىعىنا ارنالعان جادىگەرلەر تانىستىرىلدى. زاعيپ وقىرماندار كەنەن اتانىڭ تۇرمىستا پايدالانعان جەكە زاتتارى مەن كيىمدەرىن قولدارىمەن ۇستاپ تانىسۋ مۇمكىندىگىنە يە بولسا، كورۋ قابىلەتى تومەن ازاماتتار QR-كود ارقىلى سمارتفون كومەگىمەن جادىگەرلەر تۋرالى تولىق اقپارات الدى. ارنايى 26 جادىگەرگە زاماناۋي ۇلگىدەگى QR-كود ەنگىزىلىپ، مازمۇندىق تولىقتىرۋلار جاسالدى.
   
  سونىمەن قاتار، شۋ اۋداندىق تاريحي-ولكەتانۋ مۋزەيى مەن ارنايى كىتاپحانانىڭ بىرلەسۋىمەن «جانارسىز دا جارىق الەم» تاقىرىبىندا تولىقتىرۋ شاراسى ۇيىمداستىرىلدى. ءىس-شارا اياسىندا «تيفلومۋزەي» جوباسىنىڭ تاريحي-تانىمدىق بۇرىشىنا 20 QR-كود ورناتىلىپ، كەلۋشىلەرگە تاريحي جادىگەرلەردىڭ مازمۇنى سمارتفون ارقىلى قولجەتىمدى بولدى. كورمەگە كەروسين شامى، شوق ۇتىك، كۇبى، قوبىز، پيونەر بارابانى، رۋبەل، جۇگەن سەكىلدى ۇلتتىق جانە تاريحي قۇندىلىعى جوعارى بۇيىمدار قويىلىپ، ولاردىڭ تاريحى جان-جاقتى تانىستىرىلدى.
     
ەكى شارانىڭ دا باستى ماقساتى – ۇلتتىق تاريحي-مادەني قۇندىلىقتاردى ناسيحاتتاۋ، مۋزەي ەكسپوزيتسيالارىنا ەرەكشە قاجەتتىلىگى بار ازاماتتاردىڭ ەركىن قول جەتكىزۋىنە جاعداي جاساۋ جانە ەستۋ، سەزىنۋ ارقىلى تانىمدىق مۇمكىندىكتەرىن ارتتىرۋ. ءىس-شارا بارىسىندا ارنايى كىتاپحانا قورىنا كەلىپ تۇسكەن ادەبيەتتەردەن ۇيىمداستىرىلعان «كىتاپ – تاريح ايناسى، شەجىرە – ۇرپاق مۇراسى» اتتى كىتاپ كورمەسىنە بيبليوگرافيالىق شولۋ جاسالىپ، وقىرماندارعا كەڭىنەن تانىستىرىلدى.
     
شارا سوڭىندا كىتاپحانا وقىرماندارى مەن مۋزەي قوناقتارى العان اسەرلەرىمەن ءبولىسىپ، ۇيىمداستىرۋشىلارعا ريزاشىلىقتارىن ءبىلدىردى.