بۇگىن، 25-ءشى قازان الماتىداعى «مەدەۋ» مۇز ايدىنىندا رەسپۋبليكا كۇنىنە وراي مەملەكەتتىك تۋدى كوتەرۋ سالتاناتى ءوتتى.
ءىس-شاراعا قالا اكىمى ەربولات دوساەۆ، ءماسليحات دەپۋتاتتارى، جاستار جانە قوعامدىق ۇيىمداردىڭ وكىلدەرى مەن قالا تۇرعىندارى قاتىستى.
اۋماعى 98 شارشى مەتر بولاتىن مەملەكەتتىك تۋ بيىكتىگى 40 مەترلىك تۇعىرعا اسكەري وركەستردىڭ سۇيەمەلدەۋىمەن جانە ءانۇراندى ورىنداۋمەن كوتەرىلدى.
شارانى قوسقانات كوپجاسار جۇرگىزسە، جۇبانىش جەكسەنۇلى، وكتەم التاي، كەنجەبەك ءجانابىلوۆ، «IL CANTO» توبى جانە وزگە دە ونەر يەلەرى ءوز تۋىندىلارىمەن جينالعان قاۋىم كوڭىلىن وسىرە ءتۇستى.
ءىس-شارانىڭ باستى ماقساتى – قازاقستان رەسپۋبليكاسىنىڭ مەملەكەتتىك ەگەمەندىگى مەن تاۋەلسىزدىگىنىڭ ماڭىزدىلىعىن اتاپ ءوتۋ، وتانسۇيگىشتىك سەزىمىن، ازاماتتاردىڭ ءوز ەلىنىڭ داستۇرلەرىنە، تاريحى مەن مادەنيەتىنە دەگەن قىزىعۋشىلىعى مەن قۇرمەتىن نىعايتۋ.
ءراسىم مەملەكەتتىڭ بىرلىگى مەن تاۋەلسىزدىگىن، سونداي-اق ونىڭ تۇراقتى دامۋ مەن وركەندەۋگە دەگەن ۇمتىلىسىن بىلدىرەدى.
رەسپۋبليكا كۇنى-ەلىمىزدىڭ ەگەمەندىگى مەن تاۋەلسىزدىگىن الۋدى بەينەلەيتىن ۇلتتىق مەرەكە. بۇل كۇن تەرەڭ تاريحي جانە ساياسي مانگە يە، ويتكەنى 1990 جىلعى 25 قازاندا قازاق كسر-ءنىڭ مەملەكەتتىك ەگەمەندىگى تۋرالى دەكلاراتسيا قابىلداندى — بۇل 1991 جىلى جاريالانعان تاۋەلسىزدىككە العاشقى قادام بولعان ماڭىزدى قۇجات.
