سەناتورلار «جانۋارلارعا جاۋاپكەرشىلىكپەن قاراۋ تۋرالى» زاڭعا قاتىستى رەزونانس تۋدىرعان تۇزەتۋلەردى ماجىلىسكە قايتارۋدى ۇسىندى. بۇل تۋرالى پارلامەنتتىڭ جوعارعى پالاتاسى اپپاراتىنىڭ باسشىسى ماكسيم سپوتكاي ايتتى، دەپ حابارلايدى «ادىرنا» ءتىلشىسى.
زاڭ سەناتقا كەلىپ تۇسكەننەن بەرى جۇمىس توبىنىڭ 5 وتىرىسى ءوتىپ، 300-دەن استام ازاماتتىڭ ءوتىنىشى تۇسكەن. تالقىلاۋعا سەناتورلار، مەملەكەتتىك ورگان وكىلدەرى، جانۋارلاردى قورعاۋشىلار جانە قوعام بەلسەندىلەرى قاتىسقان. قاڭعىباس جانۋارلار ماسەلەسىنە ءوڭىر وكىلدەرى دە ۇلكەن الاڭداۋشىلىق بىلدىرگەن.
«قاڭعىباس جانۋارلار ماسەلەسى – ادامداردىڭ نەمقۇرايلىلىعىنىڭ سالدارى. جانۋارلاردى دۇرىس كۇتپەۋ جانە ولارعا قاتىگەزدىك كورسەتۋ ءۇشىن جاۋاپكەرشىلىك كۇشەيتىلۋى ءتيىس. پرەزيدەنتتىڭ ايتۋىنشا، ماسەلە ۋشىعىپ كەتكەن، قازىر بالالار عانا ەمەس، ەرەسەكتەر دە ءجيى جابايىلانىپ كەتكەن يتتەردىڭ قۇربانىنا اينالۋدا. مۇنداي دەرەكتەر وڭىرلەردەن ءتۇسىپ جاتىر»،-دەدى ول.
ماكسيم سپوتكاي وسىعان بايلانىستى ماجىلىستەن كەلگەن زاڭ جوباسىنا بىرقاتار تۇزەتۋ ەنگىزۋ قاجەتتىلىگى تۋىنداعانىن جەتكىزدى. سەناتورلار كەلەسى وزگەرىستەردى ۇسىنعان:
- قاڭعىباس جانۋارلاردىڭ سانىن رەتتەۋدىڭ ناقتى ءتارتىبى مەن مەرزىمدەرىن ءار ءوڭىردىڭ ءماسليحاتتارىنا دەربەس ايقىنداۋ ۇسىنىلدى;
- قاڭعىباس جانۋارلاردىڭ سانىن رەتتەۋ كەزىندە 15-باپتا «ەۆتانازيا» تەرمينىن قولدانۋدان باس تارتۋ ۇسىنىلدى;
- قاڭعىباس جانۋارلاردىڭ نەگىزگى بەلگىسى ءچيپتىڭ بولۋى عانا ەمەس، ەڭ الدىمەن يەسىنىڭ بولماۋى ەسەپتەلۋى ءتيىس. سەبەبى جاقىن ۋاقىتتا بارلىق ءۇي جانۋارلارىن تولىقتاي چيپتەۋدى، اسىرەسە شالعاي اۋىلداردا، ءىس جۇزىندە قامتاماسىز ەتۋ قيىن. بۇل تۇزەتۋ قۇقىق قولدانۋ بارىسىندا تۋىنداۋى مۇمكىن تاۋەكەلدەر مەن تەڭسىزدىكتەردىڭ الدىن الۋعا باعىتتالعان.
