قىرعىزستان ۇقك-ءنىڭ ەكس-توراعاسى قامشىبەك تاشيەۆ، ەكس-دەپۋتات قۇرمانقۇل زۋلۋشەۆ جانە جوگوركۋ كەڭەشتىڭ بۇرىنعى توراعاسى نۇرلانبەك تۇرگىنبەكۋلۋنا رەسمي تۇردە ايىپ تاعىلدى. بۇل تۋرالى ادۆوكات شەردور ابدىقاپاروۆ مالىمدەدى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
ايتۋىنشا، ۇشەۋىنە دە ءىس بويىنشا بۇعان دەيىن باسقا فيگۋرانتتارعا قولدانىلعان باپتار جاريا ەتىلگەن. ءسوز جاپپاي تارتىپسىزدىكتەردى ۇيىمداستىرۋعا جانە تەرگەۋ «مەملەكەتتىك توڭكەرىس جاساۋ ارەكەتى» دەپ باعالاپ وتىرعان ارەكەتتەرگە قاتىستى اۋىر قىلمىستىق قۇرامدار تۋرالى بولىپ وتىر.
قۇقىق قورعاۋ ورگاندارىنداعى دەرەككوزدەردىڭ مالىمەتىنشە، كۇدىكتىلەردەن ىشكى ىستەر مينيسترلىگىنىڭ تەرگەۋ باس باسقارماسىندا جاۋاپ الىنعان. تەرگەۋ بىرنەشە ساعاتقا سوزىلعان. رەسمي تۇردە تاعىلعان ايىپتاردىڭ ناقتى مازمۇنى مەن تەرگەۋ بارىسى جاريالانباعان.
ەسكە سالا كەتەيىك، بيىل اقپان ايىندا قامشىبەك تاشيەۆ قىرعىزستان ۇقك توراعاسى قىزمەتىنەن بوساتىلعان ەدى.
