قىرعىزستاندا ءولىم جازاسىن قايتارۋ ماسەلەسى رەفەرەندۋمعا شىعارىلۋى مۇمكىن، دەپ حابارلايدى "ادىرنا" ۇلتتىق پورتالى
قىرعىزستان پرەزيدەنتىنىڭ ءباسپاسوز حاتشىسى اسقات الاگوزوۆ مەملەكەت باسشىسىنىڭ سۇحباتىن جاريالاپ، وندا سادىر جاپاروۆ ەلدە ءولىم جازاسىن قايتا ەنگىزۋ باستاماسىنا قاتىستى پىكىر بىلدىرگەنىن ايتتى.
پرەزيدەنتتىڭ ايتۋىنشا، كامەلەتكە تولماعاندارعا جانە ايەلدەرگە قاتىستى كىسى ءولتىرۋ مەن زورلاۋ قىلمىستارىنىڭ سانى ءوسىپ كەلەدى، ال قازىرگى «جاي عانا» باس بوستاندىعىنان ايىرۋ مەرزىمدەرى قىلمىسكەرلەردى توقتاتا الماي وتىر.
سونىمەن بىرگە سادىر جاپاروۆ ءولىم جازاسى سىبايلاس جەمقورلىق قىلمىستارىنا قولدانىلمايتىنىن اتاپ ءوتتى. ونىڭ ايتۋىنشا، بۇل شارا تەك اسا قاتىگەز كىسى ءولتىرۋ جانە پەدوفيليا ىستەرىنە قاتىستى بولۋى مۇمكىن.
ء«بىز بۇل ماسەلەنى جەكە شەشپەيمىز. حالىقپەن اقىلداسامىز. ماسەلە بۇكىلحالىقتىق رەفەرەندۋمعا شىعارىلۋى مۇمكىن. ەگەر كوپشىلىك قولداسا، وندا كونستيتۋتسيا مەن زاڭدارعا وزگەرىستەر ەنگىزۋ جانە حالىقارالىق مىندەتتەمەلەردى قايتا قاراۋ قاجەت بولادى»، - دەدى سادىر جاپاروۆ.
پرەزيدەنتتىڭ سوزىنشە، باستى باسىمدىق - ايەلدەر مەن بالالاردى زورلىق-زومبىلىقتان قورعاۋ، ال مۇنداي ماڭىزدى شەشىم تەك حالىقتىڭ قاتىسۋىمەن قابىلدانۋى ءتيىس.
ايتا كەتەيىك، بۇعان دەيىن قىرعىزستان پرەزيدەنتى سادىر جاپاروۆ قۇقىقتىق قامتاماسىز ەتۋ باسقارماسىنا ءولىم جازاسىن قايتارۋدى تاپسىرعانى تۋرالى جازعان ەدىك.
