23 ءساۋىر – ۇلتتىق كىتاپ كۇنى. بۇل مەرەكە ەلىمىزدە ەكىنشى رەت تويلانىپ وتىر.
مەملەكەت باسشىسى قاسىم-جومارت توقاەۆ بۇل كۇننىڭ ماڭىزىن ەرەكشە اتاپ ءوتتى.
"قازىرگى كەزەڭدە باسپا ىسىندە اۋقىمدى وزگەرىستەر بولىپ جاتىر. سوعان قاراماستان، كىتاپ رۋحاني جانە ادامي قۇندىلىقتاردىڭ قاينار كوزى رەتىندە ەشقاشان ءمان-ماڭىزىن جوعالتپايدى. قازىر قوعامنىڭ كىتاپ وقۋ مادەنيەتىنە، سونىڭ ىشىندە كلاسسيكالىق كوركەم شىعارمالاردى نەمەسە بۇگىنگى زاماننىڭ وزەكتى ماسەلەلەرىنە ارنالعان جاريالانىمداردى وقۋعا بىرتىندەپ قايتا بەت بۇرىپ جاتقانى بايقالادى. وسى وڭ ءۇردىس جاستار اراسىندا دا كەڭىنەن تارالىپ كەلەدى. جاپپاي تسيفرلاندىرۋ جانە جاساندى ينتەللەكتىنىڭ ۇستەمدىگى ارتا تۇسكەن ۋاقىتتا وقۋ مادەنيەتى ۇلت ساپاسىنىڭ بىردەن-ءبىر ولشەمى رەتىندە حالقىمىزدىڭ ءبىتىم-بولمىسىنا ءتان اينىماس قاسيەت بولىپ قالا بەرۋگە ءتيىس", – دەپ جازدى پرەزيدەنت.
اتاۋلى مەرەكە اياسىندا ەلوردادا Astana Eurasian Book Fair-2026 IX حالىقارالىق كىتاپ كورمە-جارمەڭكەسى ءوتىپ جاتىر. پرەزيدەنت ورتالىعىندا ۇيىمداستىرىلعان بۇل شارا ورتالىق ازياداعى ەڭ ءىرى مادەني-اعارتۋشىلىق جوبالاردىڭ ءبىرى سانالادى. كورمەگە 80-نەن استام وتاندىق جانە شەتەلدىك باسپا مەن پوليگرافيالىق كومپانيا قاتىسىپ، ولاردىڭ باسىم بولىگى قازاقستاندىق ۇيىمدار بولدى.
كورمە اياسىندا ءداستۇرلى «ۇلتتىق كىتاپ» رەسپۋبليكالىق بايقاۋىنىڭ جەڭىمپازدارى انىقتالدى. بيىل بايقاۋعا 32 باسپادان 155 ءوتىنىم ءتۇسىپ، ۇزدىكتەر توعىز نوميناتسيا بويىنشا ماراپاتتالدى.
«ساتيرا جانرىنداعى ۇزدىك كىتاپ» نوميناتسياسىندا ءى ورىن "اتامۇرا" باسپاسى شىعارعان ءازيز نەسيننىڭ «اڭگىمە وقي وتىرىڭىز» كىتابىنا (اۋدارعان ع.قابىشۇلى) بەرىلدى. بۇل – باسپانىڭ ساپالى اۋدارما مەن ادەبي مۇرانى ناسيحاتتاۋداعى تابىستى ەڭبەگىنىڭ تاعى ءبىر دالەلى.
ايتا كەتەيىك، «اتامۇرا» باسپاسى 2025 جىلى «جىلدىڭ ۇزدىك باسپاسى» اتالىمى بويىنشا ءى ورىن يەلەنگەن بولاتىن.
جالپى، كورمە بارىسىندا جاڭا كىتاپتاردىڭ تۇساۋكەسەرى، اۆتورمەن كەزدەسۋلەر، اۆتوگراف-سەسسيالار جانە بالالارعا ارنالعان شەبەرلىك ساباقتارى ۇيىمداستىرىلىپ، وقىرمان قىزىعۋشىلىعىن ارتتىردى. تۇركيا، يسپانيا، قىتاي، ۇلىبريتانيا سىندى ەلدەردىڭ قاتىسۋى شارانىڭ حالىقارالىق دەڭگەيىن ايقىنداي ءتۇستى.
