تاتارستان مەكتەپتەرىندە انا ءتىلىن وقىتۋ ساعاتتارىن قىسقارتۋدى توقتاتۋ كەرەك. بۇل تۋرالى ماسكەۋ مەملەكەتتىك دۋماسىنىڭ دەپۋتاتى يلدار گيلمۋتدينوۆ قازاندا وتكەن كوپتىلدى ەتنومادەني ءبىلىم بەرۋدىڭ قازىرگى تاجىريبەلەرى جونىندەگى كونفەرەنتسيادا مالىمدەدى، دەپ حابارلايدى «ادىرنا» ءتىلشىسى.
«انا ءتىلىن وقىتۋ ساعاتتارىنىڭ قىسقارتىلۋى مۇلدە قابىلدانبايدى. ءبىرىنشى سىنىپتا ونى ءبىر ساعاتقا ازايتۋ تۋرالى سوڭعى شەشىممەن كەلىسپەيمىن. نەلىكتەن ءدال انا ءتىلى؟ بۇل – ەڭ ماڭىزدى پاندەردىڭ ءبىرى عوي»، – دەدى ول.
گيلمۋتدينوۆ 2026 جىل رەسەي حالىقتارىنىڭ بىرلىگى جىلى دەپ جاريالانعانىن جانە بۇل شەشىمدى ساۋالناماعا قاتىسقانداردىڭ 70 پايىزدان استامى قولداعانىن ەسكە سالدى. ونىڭ ايتۋىنشا، كۇردەلى كەزەڭدە كوپۇلتتى حالىقتىڭ بىرلىگى ەرەكشە ماڭىزدى.
ء«بىر-ءبىرىمىزدى قۇرمەتتەمەي، وزگە حالىقتاردىڭ مادەنيەتىن، ءتىلىن جانە ءداستۇرىن قولداماي ءومىر ءسۇرۋ مۇمكىن ەمەس»، – دەدى دەپۋتات.
ول سونداي-اق فەدەرالدى دەڭگەيدە رەسەي حالىقتارىنىڭ تىلدەرى مەن مادەنيەتىن ساقتاۋعا قاجەتتى تەتىكتەردىڭ قابىلدانعانىن ايتتى. بۇگىنگى باستى مىندەت – سول شەشىمدەردى ءبىلىم بەرۋ، مادەنيەت، قوعام جانە وتباسى سالالارىندا جۇزەگە اسىرۋ. گيلمۋتدينوۆتىڭ پىكىرىنشە، اسىرەسە، بالاباقشالارعا ەرەكشە كوڭىل ءبولۋ قاجەت.
«بالالار بىرنەشە ءتىلدى قاتار مەڭگەرە الادى. ءبىز وسى باعىتتا جۇمىس ىستەيمىز. بالا قاي ەلدە تۇرسا دا، ءوز انا ءتىلىن ۇيرەنۋگە مۇمكىندىگى بولۋى كەرەك. ءبىز سونى قامتاماسىز ەتۋىمىز قاجەت»، – دەپ تۇيىندەدى دەپۋتات.
ەسكە سالا كەتەيىك، 2025 جىلعى 1 قىركۇيەكتەن باستاپ رەسەيدىڭ وقۋ-اعارتۋ مينيسترلىگى مەكتەپتەردە انا ءتىلىن وقىتۋ ساعاتتارىن ەكى ساعاتتان ءبىر ساعاتقا دەيىن، ال ورىس تىلىندە وقىتپايتىن مەكتەپتەردە ءۇش ساعاتتان ەكى ساعاتقا دەيىن قىسقارتۋدى جوسپارلاعان بولاتىن. تاتارستان بۇل شەشىمگە قاتتى قارسىلىق ءبىلدىردى. 2017 جىلى تاتارستان رەسپۋبليكادا ۇلتتىق ءتىلدى وقىتۋ مىندەتتى بولمايتىنىمەن كەلىسكەن ەدى، الايدا بۇل جولى مەملەكەتتىك كەڭەس دەپۋتاتتارى «انا ءتىلى» ءپانىن وقىتۋ ماسەلەسىن قايتا كوتەردى. تاتارلار مەن ساحالار (ياكۋتتار) جاساعان كۇش-جىگەردىڭ ناتيجەسىندە فەدەرالدىق انا تىلدەرى ينستيتۋتى مەكتەپ ءپانىنىڭ بۇرىنعى اتاۋىن ساقتاۋعا كەلىستى.
