گرۋزيانىڭ 55 مىڭعا جۋىق تۇرعىنى ورىس ءتىلىن ءوز انا ءتىلى سانايدى. بۇل تۋرالى «Sputnik گرۋزيا» جازدى، دەپ حابارلايدى «ادىرنا» ءتىلشىسى. بۇل گرۋزيا حالقىنىڭ نەبارى 1,39 پايىزىن قۇرايدى.
باسىلىم 2024 جىلى جۇرگىزىلگەن جالپىۇلتتىق حالىق ساناعىنىڭ قورىتىندىلارىنا سۇيەنگەن. ساناق دەرەكتەرىنە سايكەس، گرۋزيا حالقىنىڭ سانى 3 929 581 ادامدى قۇراپ وتىر. ونىڭ ىشىندە انا ءتىلى رەتىندە ورىس ءتىلىن كورسەتكەن 11 128 ادام مەملەكەتتىك ءتىل – گرۋزين ءتىلىن مۇلدە بىلمەيتىنى ايتىلعان.
22 918 ادام گرۋزين ءتىلىن ەركىن مەڭگەرگەن، ال 13 088 تۇرعىن ونى ءىشىنارا بىلەدى. ال 7 326 ادامنىڭ گرۋزين ءتىلىن مەڭگەرۋ دەڭگەيى تۋرالى مالىمەت جوق.
ءورىستىلدى تۇرعىنداردىڭ باسىم بولىگى گرۋزيانىڭ ءىرى قالالارىندا تۇرادى. ولاردىڭ جارتىسىنان استامى تبيليسيدە ءومىر سۇرەدى. ال گرۋزين ءتىلىن بىلمەيتىن ءورىستىلدى تۇرعىندار ەڭ كوپ شوعىرلانعان قالا – باتۋمي. بۇل كورسەتكىش بويىنشا تبيليسي ەكىنشى ورىندا تۇر.
