ازەربايجان بيلىگى كرەمل باقىلاۋىنداعى "Sputnik ازەربايجان" رەداكتسياسىندا قىزمەتكەر سانىن 40-تان ءبىر ادامعا دەيىن قىسقارتۋعا شەشىم قابىلدادى. بۇل تۋرالى ازەربايجاننىڭ Caliber جانە Trend باسىلىمدارى دەرەككوزدەرىنە سۇيەنىپ جاريالاعان، دەپ حابارلايدى “ادىرنا” ۇلتتىق پورتالى “ازاتتىق راديوسىنا” سىلتەمە جاساپ.
باسىلىمداردىڭ مالىمەتىنشە، مۇنداي شەشىم باكۋدە جۇمىس ىستەيتىن شەتەل جۋرناليستەرى مەن شەتەلدەگى ازەربايجاننىڭ مەملەكەتتىك باسىلىمدارىنىڭ جاعدايىن "تەڭەستىرۋ" ءۇشىن قابىلدانعان.
"باكۋدەگى "Sputnik ازەربايجان" جۋرناليستەرىنىڭ سانى رەسەيدەگى Azertag مەملەكەتتىك اگەنتتىگىنىڭ جۋرناليستەرى سانىمەن تەڭ بولادى. ياعني، ءبىر تىلشىگە دەيىن قىسقارادى", – دەپ تۇسىندىرگەن Trend سويلەسكەن دەرەككوز.
رەسەيلىك Sputnik اگەنتتىگىنىڭ باكۋدەگى فيليالى جۇمىسىن توقتاتادى دەپ وتىر.
بۇعان قوسا، BBC-ءدىڭ ازەربايجان قىزمەتىنىڭ جۇمىسى دا وزگەرەتىنى ايتىلدى. بريتاندىق كورپوراتسيانىڭ وسى قىزمەتىندە ناقتى قانشا ادام قىسقاراتىنى ازىرشە بەلگىسىز.
اقپاننىڭ باسىندا ازەربايجان بيلىگى ماسكەۋگە رەسەيدىڭ "روسسوترۋدنيچەستۆو" اگەنتتىگى قىزمەتىن ەل اۋماعىندا توقتاتاتىنى جايلى رەسمي نوتا جىبەرگەن. ازەربايجان سىرتقى ىستەر مينيسترلىگى "باكۋدەگى رەسەيدىڭ اقپاراتتىق-مادەني ورتالىعى – "روسسوترۋدنيچەستۆو" وكىلدىگى سانالاتىن "ورىس ءۇيى" زاڭدى تۇلعا رەتىندە تىركەلمەگەن" دەدى.
ونىڭ الدىندا ازەربايجان بيلىگى باقىلاۋىنداعى Baku.tv تەلەارناسى ازەربايجانداعى "ورىس ءۇيىنىڭ" جۇمىسى تۋرالى رەپورتاج جاريالاعان، وندا وكىلدىك قىزمەتكەرلەرىن ۇنامسىز ارەكەتپەن، ءتىپتى تىڭشىلىقپەن اينالىسقان دەپ ايىپتادى. "روسسوترۋدنيچەستۆو" باسشىسى ەۆگەني پريماكوۆ "ورىس ءۇيى" "تەك ءبىلىم، مادەنيەت، عىلىم سالاسىنداعى قىزمەتپەن" اينالىسادى دەپ مالىمدەدى.
رەپورتاج اقتاۋ ماڭىندا قۇلاعان Azerbaijan Airlines اۋەكومپانياسىنىڭ جولاۋشى ۇشاعى اپاتىنان بىرنەشە اپتا وتكەندە ەفيرگە شىقتى. ازەربايجان ۇشاقتى بايقاۋسىزدا رەسەيدىڭ اۋە قورعانىس جۇيەسى اتتى دەپ، اپاتقا ماسكەۋدى ايىپتاي سويلەدى.
ەسكە سالساق Azerbaijan Airlines اۋەكومپانياسىنىڭ Embraer ERJ 190-100 جولاۋشى ۇشاعى بىلتىر 25 جەلتوقساندا اقتاۋ ماڭىنا قۇلادى. اپات سالدارىنان 38 ادام قازا تاۋىپ (ۇشەۋى ەكيپاج مۇشەسى), 29 ادام زارداپ شەكتى. قازا تاپقانداردىڭ التاۋى – قازاقستاننىڭ، 25 ادام – ازەربايجاننىڭ، جەتەۋى - رەسەيدىڭ ازاماتتارى.
