قاراعاندى وبلىسىنىڭ پروكۋراتۋراسى الەۋمەتتىك جەلىلەردە ۇلتارالىق سيپاتتاعى جانجالعا تۇرتكى بولاتىن جازبالار مەن پىكىرلەردىڭ جيىلەپ كەتكەنىن مالىمدەدى، دەپ حابارلايدى "ادىرنا" ۇلتتىق پورتالى.
قاداعالاۋشى ورگاننىڭ مالىمەتىنشە، مۇنداي ارەكەتتەر ءۇشىن قازاقستان قىلمىستىق كودەكسىنىڭ 174-بابىنا سايكەس 2 جىلدان 7 جىلعا دەيىن، ال اۋىر زارداپتارعا اكەلگەن جاعدايدا 12 جىلدان 20 جىلعا دەيىن باس بوستاندىعىنان ايىرۋ جازاسى قاراستىرىلعان.
پروكۋراتۋرا وكىلدەرى Instagram, TikTok, Threads سەكىلدى الەۋمەتتىك جەلىلەردە ءاربىر قولدانۋشىنىڭ پىكىر ءبىلدىرۋ ەركىندىگى بار ەكەنىن، الايدا ول زاڭ تالاپتارىنا قايشى كەلمەۋى ءتيىس ەكەنىن اتاپ ءوتتى.
"ۇلتارالىق ارازدىقتى قوزدىرۋ ەكسترەميستىك قىلمىس بولىپ سانالادى. مۇنداي قۇقىقبۇزۋشىلىق جاساعان تۇلعالار بەلسەندى وكىنىپ، جابىرلەنۋشىدەن كەشىرىم سۇراسا دا، بۇل ولاردىڭ قىلمىستىق جاۋاپكەرشىلىكتەن بوساتىلۋىنا نەگىز بولمايدى", – دەلىنگەن ۆەدومستۆو حابارلاماسىندا.
پروكۋرورلار ازاماتتاردى زاڭدى ساقتاۋعا، ءاربىر جاريالانىم مەن ايتىلعان سوزگە جاۋاپكەرشىلىكپەن قاراۋعا شاقىردى.
"قوعامداعى بەيبىتشىلىك پەن تۇراقتىلىقتى تەك ءوزارا قۇرمەت پەن قۇقىقتىق مادەنيەت ارقىلى ساقتاي الامىز", – دەدى قاداعالاۋشى ورگان وكىلدەرى.
