قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، بەلگىلى اكتەر جانە رەجيسسەر بالتاباي سەيىتمامىتۇلى دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى قر مادەنيەت جانە اقپارات مينيسترلىگى حابارلاپ، مارقۇمنىڭ وتباسى مەن جاقىندارىنا، تۋعان حالقىنا كوڭىل ايتتى.
بالتاباي سەيىتمامىتۇلى سانالى عۇمىرىن قازاق ساحنا ونەرىنە ارناعان كورنەكتى تۇلعالاردىڭ ءبىرى بولدى. ول عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر اكادەميالىق تەاترى مەن مۇحتار اۋەزوۆ اتىنداعى قازاق ۇلتتىق دراما تەاترى ساحناسىندا كوپتەگەن جارقىن وبرازداردى سومداپ، ۇلتتىق تەاتر ونەرىنىڭ دامۋىنا زور ۇلەس قوستى.
ونەر يەسى كلاسسيكالىق جانە زاماناۋي دراماتۋرگيا تۋىندىلارىن تەرەڭ فيلوسوفيالىق مازمۇنمەن، جوعارى اكتەرلىك شەبەرلىكپەن ساحنادا بەينەلەي ءبىلدى. ونىڭ شىعارماشىلىق مۇراسى مەن ساحناداعى بەينەلەرى قازاق مادەنيەتىنىڭ التىن قورىندا ساقتالادى.
