قازاقستاننىڭ بەلگىلى رەجيسسەرى الىبەك ومىربەكۇلى جاڭا سپەكتاكلىمەن كورەرمەندى قۋانتادى. شىعارما ءداستۇرلى تەاترالدىق ۇلگىدەن تىس، زاماناۋي پوستدرامالىق تەاتر ستيلىندە ۇسىنىلادى.
«شىدەر» – قازاقستان تەاتر تاريحىندا بارلاۋ وپەراتسيالارىن ساحنالايتىن العاشقى تۋىندى. سپەكتاكلدە شيەلەنىسكە تولى وقيعالار مەن تارتىمدى سيۋجەتتەر كورەرمەنگە ۇسىنىلادى.
باستى كەيىپكەرلەردى قازاقستاننىڭ ەڭبەك سىڭىرگەن قايراتكەرى اينۇر بولات پەن تەاتر جانە كينو اكتەرى ەرجان نۇرىمبەت سومدايدى.
«شىدەر» – ماحاببات پەن پارىز اراسىنداعى ءۇنسىز مايدان. قوسان مەن اقجان – ءبىر ءداۋىردىڭ بالالارى. ولاردى توعىستىرعان – الماتىنىڭ ىستىق كوشەلەرى، ال ايىرعان – تاعدىردىڭ قۇپيا جولى. ءبىرى – ەل ءۇشىن ءۇنسىز قىزمەت ەتكەن بارلاۋشى، ەكىنشىسى – سول ەلدىڭ شەتتەگى قورعاۋشىسى.
ماحاببات بار، بىراق ايتۋعا بولمايدى. ساعىنىش بار، بىراق جول جابىق. ولاردى ۇستاپ تۇرعان – شىدەر.
دراما ەل تاعدىرى مەن جەكە سەزىم اراسىنداعى كۇرەس، تىڭ الەم، تىلسىم قىزمەت پەن تۇيسىكتى قوزعايتىن شىندىق تۋرالى باياندايدى. «شىدەر» – پارىزعا بايلانعان ماحابباتتىڭ حيكاياسى.
