ەۋروپالىق كەڭەستىڭ توراعاسى رەسەيدىڭ ۋكرايناداعى ازاماتتىق نىساندارعا جاساعان سوققىلارىن قاتاڭ ايىپتادى، دەپ حابارلايدى "ادىرنا" ۇلتتىق پورتالى.
ول 16 ساۋىرگە قاراعان ءتۇنى جاسالعان شابۋىلدارعا قاتىستى X جەلىسىندە پىكىر ءبىلدىردى. كوشتانىڭ ايتۋىنشا، رەسەي ۋكرايناعا قارسى اگرەسسيالىق سوعىستا ماقساتىنا جەتە الماعان سوڭ، سانالى تۇردە بەيبىت حالىقتى تەررورلاۋعا كوشكەن.
«وتكەن ءتۇنى رەسەي ۋكرايناداعى ازاماتتىق نىساندارعا تاعى دا جويقىن سوققى جاسادى. ادامدار ۇيلەرىندە ۇيىقتاپ جاتقان كەزدە كيەۆ، دنەپر، ودەسسا جانە حاركوۆ قالالارىنا ونداعان بالليستيكالىق زىمىران مەن جۇزدەگەن درون باعىتتالدى. رەسەي قارۋلى كۇشتەرى قۇتقارۋشىلار وقيعا ورنىنا كەلگەندە، ولارعا قايتا-قايتا سوققى جاساعان»، — دەدى ول.
كوشتا رەسەيدىڭ بۇل «تەررورلىق سوعىسىن» توقتاتۋى ءتيىس ەكەنىن اتاپ ءوتتى. ونىڭ ايتۋىنشا، ۋكراينادا بۇۇ جارعىسى مەن حالىقارالىق قۇقىق قاعيداتتارىنا نەگىزدەلگەن ءادىل ءارى تۇراقتى بەيبىتشىلىك ورناۋى قاجەت.
سونىمەن قاتار، ەۋرووداق مۇنداي بەيبىتشىلىككە قول جەتكىزۋ ءۇشىن رەسەيگە قىسىمدى ودان ءارى كۇشەيتىپ، ۋكرايناعا قولداۋ كورسەتۋدى جالعاستىراتىنىن جەتكىزدى.
ءوز كەزەگىندە ۋكراينا پرەزيدەنتى ۆلاديمير زەلەنسكي رەسەيگە قارسى سانكتسيالاردى السىرەتپەۋگە شاقىردى.
ول X جەلىسىندە رەسەيدىڭ ارەكەتتەرىنە قاتىستى پىكىر ءبىلدىرىپ، «رەسەيگە قاتىستى ەشقانداي جەڭىلدىك نەمەسە سانكتسيالاردى الىپ تاستاۋ بولماۋى ءتيىس» دەدى.
زەلەنسكيدىڭ مالىمەتىنشە، 15 ءساۋىر كۇنى مەن 16 ساۋىرگە قاراعان ءتۇنى رەسەي ۋكراينا اۋماعىنا شامامەن 700 ۇشقىشسىز ۇشۋ اپپاراتىن، 19 بالليستيكالىق زىمىران جانە قاناتتى زىمىراندار ۇشىرعان. بالليستيكالىق زىمىرانداردىڭ باسىم بولىگى كيەۆ قالاسىنا باعىتتالعان.
«قازىرگى جاعدايدا رەسەيمەن قارىم-قاتىناستى قالىپقا كەلتىرۋ مۇمكىن ەمەس. قىسىم جالعاسۋى ءتيىس»، — دەدى ۋكراينا باسشىسى.
