قازاقستاننىڭ ەڭبەك سىڭىرگەن ءارتىسى تامارا قوسۋباەۆا 95 جاسىندا قايتىس بولدى، دەپ حابارلايدى “ادىرنا” ۇلتتىق پورتالى.
ساحنادا بايان سۇلۋ بەينەسىن تاماشا سومداي بىلگەن ونى «ناعىز قازاق ارۋى» اتادى. ودان كەيىن اكتريسا ابدۋللا قارساقباەۆتىڭ «بالالىق شاققا ساياحات» ءفيلمىنىڭ باستى كەيىپكەرىنىڭ اناسى، قۇرباندىق شالعان دانا اسپەتپەن تانىلدى. كەيىنىرەك جاسى ۇلعايعان رولدەردى سومداي وتىرىپ، تامارا وكىمەتقىزى ءوز كورەرمەندەرى ءۇشىن مەيىرىمدى «حالىق اجەسىنە» اينالا ءبىلدى.
“كينو مەنىڭ ءومىرىم، ال اكتەرلىك ونەر - كاسىپ ەمەس، ەمى جوق دەرت. سوعان ەرىپ كەتەسىڭ. قازىردىڭ وزىندە مەن ءبىزدىڭ كەزىمىزدە رومانتيزمگە، وقيعالارعا، تاماشا كوڭىل-كۇۋگە تولى ساحنانى، رولدەردى، گاسترولدەردى قاتتى ساعىنامىن. تەاتر ساحناسىنان زەينەتكەرلىككە شىققانداعى سول ءبىر اششى ءسات ەسىمدە، بىراق ودان كەيىن تۇسىرىلىمدەر، دۋبلياجدار، راديولار بولدى. سۇيىكتى ىسىممەن اينالىستىم. ال ەندى مەنىڭ باستى قۋانىشىم، مەنىڭ بالالارىم، نەمەرەلەرىم، شوبەرەلەرىم ءومىر سۇرۋگە ىنتالاندىرادى»، دەگەن ەدى ءبىر سوزىندە.
“ادىرنا” ۇلتتىق پورتالىنىڭ ۇجىمى تامارا قوسۋباەۆانىڭ بارلىق تۋعان-تۋىستارى مەن جاقىندارىنا قايعىلارىنا ورتاقتاسىپ، كوڭىل ايتادى.
