الماتىدا تانىمال بلوگەر ءارى كاسىپكەردىڭ كولىگىن العان 22 جاستاعى ەر ادام كوز جۇمدى، دەپ حابارلايدى “ادىرنا” ۇلتتىق پورتالى.
قايعىلى وقيعا 29 قازان كۇنى اقساي اۋىلىنداعى "سوكول" اۆتودرومىندا بولعان.
تريۋك ورىنداۋ كەزىندە 22 جاستاعى جىگىت 45 جاستاعى جۇرگىزۋشى باسقارعان كولىكتىڭ استىندا قالىپ قويعانى انىقتالدى. اۋىر جاراقات العان جىگىت اۋداندىق اۋرۋحاناعا جەتكىزىلگەن. الايدا، وندا 30 قازان كۇنى ەسىن جيماستان كوز جۇمىپتى.
حالىق الدىندا جۇرگەن بلوگەر قايعىلى جاعدايعا قاتىستى پىكىر بىلدىرگەن بەينەسى Tiktok جەلىسىندە تاراعان. بلوگەر بەيبىت الىبەكوۆ ءوزىنىڭ Lamborghini كولىگىن 22 جاستاعى جىگىتتىڭ سۇراعانىن ايتتى.
«مەنەن كولىك سۇراعان باتىرحان ەرجان دەگەن جىگىتتى ەسكە تۇسىرەيىك. مەن اۋەلدە وعان بەرمەدىم. ول كولىكتى قايتا-قايتا سۇرادى. تريۋك جاساپ، ۆيدەوعا تۇسىرگىسى كەلەتىنىن ايتقان. بىرنەشە رەت سۇراعاننان كەيىن كولىگىمدى بەرگەن بولاتىنمىن. قايعىلى وقيعا تريۋك جاساۋ كەزىندە ورىن العان. ارتىنشا ول اۋرۋحانادا كوز جۇمدى. كولىگىمدى بەرمەۋىم كەرەك ەدى. وتباسى مەن جاقىندارىنا قايعىرىپ كوڭىل ايتامىن", – دەلىنگەن الىبەكوۆتىڭ بەينەسىندە.
بۇل وقيعاعا الماتى وبلىسىنىڭ پوليتسيا دەپارتامەنتى تۇسىنىكتەمە بەردى.
«29 قازاندا اۆتودروم اۋماعىندا 22 جاستاعى جاس جىگىت ۆيدەوتۇسىرىلىم كەزىندە تريۋك جاساپ جاتقاندا، ابايسىزدا 45 جاستاعى جۇرگىزۋشى باسقارعان كولىكتىڭ دوڭعالاقتارىنىڭ استىنا ءتۇسىپ قالدى. سونىڭ سالدارىنان زارداپ شەگۋشى اۋداندىق اۋرۋحاناعا جاتقىزىلدى، ول 30 قازاندا ەسىن جيماستان قايتىس بولدى»، – دەلىنگەن حابارلامادا.
