استانادا مىسىرلىق ترەۆەل-بلوگەر احمەد حاگگاگوۆيچ تۇسىرگەن ۆيدەوعا بايلانىستى پوليتسيا قىزمەتكەرلەرىنە قاتىستى قىزمەتتىك تەكسەرۋ باستالدى، دەپ حابارلايدى "ادىرنا" ۇلتتىق پورتالى.
بۇل تۋرالى ەلوردا پوليتسيا دەپارتامەنتىنىڭ ءباسپاسوز قىزمەتى ايتتى.
الەۋمەتتىك جەلىدە تاراعان ۆيدەو «حان شاتىر» ساۋدا-ويىن-ساۋىق ورتالىعىنىڭ ماڭىندا تۇسىرىلگەن. كادرلاردا بلوگەر ەكى پوليتسيا قىزمەتكەرىمەن بىرگە بي قيمىلدارىن جاساعان. سونداي-اق ول قىزمەتكەرلەردىڭ ءبىرىن كوتەرىپ، اينالدىرعان.
بلوگەر بەينەروليككە قازاقستاندىق پوليتسيا قىزمەتكەرلەرىنىڭ سۇلۋلىعى مەن مەيىرىمدىلىگىن اتاپ، جازبا قالدىرعان.
الايدا ۆيدەوعا قاتىستى پىكىر بىلدىرگەن كەيبىر قازاقستاندىقتار پوليتسيا قىزمەتكەرلەرىنىڭ مۇنداي ارەكەتىن ورىنسىز دەپ باعالاعان. ولاردىڭ ايتۋىنشا، قىزدار ۆيدەو تۇسىرىلگەن كەزدە قىزمەتتىك مىندەتتەرىن اتقارىپ جۇرگەن.
وسىعان بايلانىستى استانا قالاسىنىڭ پوليتسيا دەپارتامەنتى قىزمەتتىك تەكسەرۋ باستاعان.
«ونىڭ ناتيجەسى بويىنشا قىزمەتكەرلەردىڭ ارەكەتىنە قۇقىقتىق باعا بەرىلەدى. قاجەت بولعان جاعدايدا تارتىپتىك سيپاتتاعى شارالار قابىلدانادى»، – دەدى ۆەدومستۆونىڭ ءباسپاسوز قىزمەتى.
