كەز كەلگەن ەلدىڭ وركەنيەتى ونىڭ بيىك عيماراتتارىمەن ەمەس، قوعامداعى ەڭ ءالسىز ازاماتتارىنا قانداي مۇمكىندىك بەرگەنىمەن ولشەنەدى.
وكىنىشكە قاراي، قازاقستاندا مۇمكىندىگى شەكتەۋلى ادامنىڭ تابيعاتقا شىعۋى، تاۋعا كوتەرىلۋى نەمەسە وتباسىمەن بىرگە دەمالۋى ءالى كۇنگە دەيىن قالىپتى قۇبىلىس ەمەس. بۇل – ادامنىڭ ەمەس، قوعامنىڭ مۇمكىندىگىنىڭ شەكتەۋلى ەكەنىن كورسەتەتىن شىندىق.
وسى ماسەلەنى قازاقستان مۇگەدەكتەر ۇيىمدارى وداعىنىڭ جەتەكشىسى، الماتى قالالىق مۇگەدەكتەر قوعامىنىڭ توراعاسى ۇلان ىنكاربەكوۆ كوتەردى. ول كوكجايلاۋ ۇستىرتىندە جۇزەگە اسىرىلاتىن Almaty Superski جوباسىن قولدايتىنىن ايتىپ، ونىڭ ەڭ ماڭىزدى تۇسى – ينكليۋزيۆتى ورتا قالىپتاستىرۋ ەكەنىن جەتكىزدى.
«نەلىكتەن مۇمكىندىگى شەكتەۋلى ادام دەمالىس كۇنى وتباسىمەن بىرگە تابيعاتقا بارىپ، وزگەلەر سياقتى دەمالا المايدى؟ سەبەبى قولجەتىمدىلىك جەتكىلىكسىز ءارى باعاسى قىمبات»، – دەيدى ول.
بۇل – مىڭداعان قازاقستاندىقتىڭ جانايقايى.
ءبىز كوبىنە ينكليۋزيۆتىلىكتى مەكتەپتەگى پاندۋسپەن نەمەسە مەملەكەتتىك مەكەمەدەگى ارنايى ەسىكپەن عانا ولشەيمىز. بىراق ادام ءومىرى مەملەكەتتىك مەكەمەمەن شەكتەلمەيدى. ونىڭ دا ساياحاتتاعىسى كەلەدى، تاۋدىڭ سامالىن جۇتقىسى كەلەدى، بالالارىمەن بىرگە قار ويناعىسى نەمەسە جاي عانا كۇننىڭ باتۋىن بيىكتەن تاماشالاعىسى كەلەدى.
تابيعات – ەشكىمنىڭ جەكەمەنشىگى ەمەس. ول – بارىنە ورتاق. الايدا سول ورتاق دۇنيەگە جەتۋ مۇمكىندىگى بارىنە بىردەي بولماي تۇر.
كوكجايلاۋ جوباسى توڭىرەگىندە قوعامدا ءتۇرلى پىكىر ايتىلىپ كەلەدى. ءبىرى ەكولوگيا ماسەلەسىن كوتەرسە، ەندى ءبىرى ءتۋريزمنىڭ دامۋىنا باسىمدىق بەرەدى. بىراق وسى پىكىرتالاستا ءجيى ۇمىت قالاتىن ءبىر ماسەلە بار. ول – مۇمكىندىگى شەكتەۋلى ازاماتتاردىڭ قۇقىعى.
ەگەر جاڭا تۋريستىك نىسان حالىقارالىق تالاپتارعا ساي سالىنىپ، قولاربامەن جۇرەتىن ازاماتقا دا، قارت ادامعا دا، ەرەكشە قاجەتتىلىگى بار بالاعا دا قولجەتىمدى بولسا، وندا بۇل قوعامنىڭ جاڭا مادەنيەتىنىڭ كورىنىسى بولماق.
ۇلان ىنكاربەكوۆ تە وسىنى مەڭزەيدى.
«ەڭ باستىسى – مۇمكىندىگى شەكتەۋلى ادامدار ءۇشىن قولجەتىمدى ورتا قالىپتاستىرۋ. بارلىعى شىن نيەتپەن جاسالۋى كەرەك. جىلدام سالىپ، پايدا تاۋىپ كەتۋ ماقساتىندا ەمەس»، – دەيدى ول.
جوبا اياسىندا Kazakh Tourism Development Ltd. كومپانياسى مەن الماتى قالالىق مۇگەدەكتەر قوعامى بەس جىلدىق مەموراندۋمعا قول قويدى. قۇجات اياسىندا كۋرورتتاعى قوناقۇيلەر، جاياۋ جۇرگىنشى جولدارى، قوعامدىق تاماقتانۋ ورىندارى مەن سەرۆيستىك ايماقتار حالىقارالىق ينكليۋزيۆتىلىك ستاندارتتارىنا ساي جوسپارلانباق. سونىمەن قاتار ەرەكشە قاجەتتىلىگى بار ازاماتتار جوبانى تالقىلاۋعا جانە ونىڭ قۇجاتتارىمەن تانىسۋعا قاتىسا الادى.
بۇل – ماڭىزدى قادام. ويتكەنى ينكليۋزيۆتى ورتا كابينەتتە ەمەس، سول ورتانى پايدالاناتىن ادامداردىڭ پىكىرىن ەسكەرۋ ارقىلى قالىپتاسادى.
بۇگىندە الەمنىڭ دامىعان ەلدەرىندە ينكليۋزيۆتى تۋريزم – الەۋمەتتىك جاۋاپكەرشىلىكتىڭ اجىراماس بولىگى. سەبەبى دەمالۋ، ساياحاتتاۋ نەمەسە تابيعات اياسىندا سەرۋەندەۋ – ادامنىڭ ءومىر ساپاسىن ايقىندايتىن نەگىزگى قۇقىقتاردىڭ ءبىرى.
سوندىقتان كوكجايلاۋ تۋرالى اڭگىمە تەك جاڭا كۋرورت جونىندە ەمەس. بۇل – ءبىز قانداي قوعام قۇرعىمىز كەلەتىنى تۋرالى اڭگىمە.
ءبىز تەك دەنى ساۋ ادامدارعا عانا قولايلى مەملەكەت قالىپتاستىرامىز با، الدە ءاربىر ازامات ءوزىن قوعامنىڭ تولىققاندى مۇشەسى رەتىندە سەزىنەتىن قازاقستاندى قۇرامىز با؟
ويتكەنى تاۋ ەشكىمدى بولمەيدى. ادامداردى ءبولىپ تۇرعان – ءبىزدىڭ سالعان كەدەرگىلەرىمىز عانا.
