قازاقستاننىڭ "بالالاردىڭ قۇقىعىن قورعاۋ" قوعامدىق ۇيىمىنىڭ مۇشەلەرى الماتىدا قوعام بەلسەندىسى ابزال دوستياروۆتى كىشكەنتاي قىزىمەن بىرگە دورەكى تۇردە ۇستاعان پوليتسەيلەردىڭ ارەكەتىنە نارازىلىق ءبىلدىردى، دەپ حابارلايدى “ادىرنا” ۇلتتىق پورتالى.
پوليتسەيلەر كىشكەنتاي قىزدى اكەسىمەن بىرگە دورەكى تۇردە ۇستاپ، اناسى كەلگەنشە، پوليتسيا ۋچاسكەسىندە قاماۋدا وتىرعان. بۇل جونىندە جەلىدە ۆيدەو دا تارادى. بالانىڭ اناسى دانا سارسەنباەۆا پوليتسەيلەردىڭ ۇستىنەن شاعىم ءتۇسىردى. ۇرەيلەنگەن ءبۇلدىرشىندى اناسىنا قايتارعاندا دا دورەكىلىك تانىتىپ، اكەسىن پوليتسيا ۋچاسكەسىندە قالدىرعان.
"5 قاڭتار كۇنى تاڭەرتەڭ تىركەلمەگەن دەموكراتيالىق پارتيانىڭ بەلسەندىسى ابزال دوستياروۆ، ادەتتەگىدەي، تاڭعى ساعات 8-دە، 4 جاسار قىزىمەن بىرگە، ونى بالا باقشاعا اپارىپ تاستاۋ ءۇشىن، ۇيدەن شىعادى. اۋلادا، ونى ۇستاۋ ماقساتىمەن، وعان بىرنەشە پوليتسيا قىزمەتكەرى جابىلا كەتەدى. مۇنىڭ ءبارى بەينە باقىلاۋشى كامەرالارعا ءتۇسىپ قالعان. سوندىقتان دا، شىندىعىنا ەش كۇمان تۋعىزبايدى. ءبىز دە، باسقا جۇزدەگەن قازاقستاندىقتار دا ول بەينە جازبانى كورىپ شىقتىق. اناسىنىڭ سوزىنە قاراعاندا، قىزدىڭ اكەسى قىزىن ۇيگە اپارىپ تاستاۋعا پوليتسەيلەردى كوندىرمەكشى بولعان. الايدا، ولار ونى تىڭداماي، قىزىمەن بىرگە كۇشتەپ، پوليتسيا بولىمىنە جەتكىزگەن", - دەيدى قۇقىق قورعاۋشىلار.
پوليتسيا كولىگىنىڭ ىشىندە ۇرەيى ۇشقان قىز بالا ءوزىن بالا باقشاعا اپارىپ تاستاۋلارىن وتىنەدى. بىراق، پوليتسەيلەر ءبۇلدىرشىن مەن ونىڭ اكەسىنىڭ ءوتىنىشىن ەلەمەي قويعان. 4 جاسار قىز بالا اۋەزوۆ اۋداندىق ىشكى ىستەر بولىمىندە، اناسى الىپ كەتكەنشە، ەكى ساعاتتاي ۋاقىت وتىرعان.
ء"تىپتى قىز بالانىڭ اكەسى ءبىر نارسە بۇلدىرسە دە، مىسالى، سانكتسيا بەرىلمەگەن ميتينگكە شىقسا دا، بالا ونىڭ ىستەگەنى ءۇشىن جاۋاپ بەرمەيدى، بەرۋى دە مۇمكىن ەمەس. قۇقىق قورعاۋشى ورگان قىزمەتكەرلەرى بالا قۇقىن دورەكى بۇزدى", - دەلىنگەن مالىمدەمەدە.
بۇل جونىندە قۇقىق قورعاۋشىلار 1994 جىلى قازاقستان بۇۇ-ىنىڭ بالا قۇقى جونىندەگى كونۆەنتسياسىن بەكىتكەنىن، 3-باپتىڭ 1-تارماعى تۋرالى ايتا كەتەدى.
"بالاعا قاتىستى قانداي دا ءىس-ارەكەت بارىسىندا، ونى الەۋمەتتىك قامتاماسىز ەتۋمەن اينالىساتىن، سوت، اكىمشىلىك الدە زاڭ شىعارۋشى ورگان سىندى مەملەكەتتىك نەمەسە جەكە مەكەمە بولسىن، ەڭ ءبىرىنشى نازاردا بالا مۇددەسىن بارىنشا دۇرىس قامتاماسىز ەتۋ ماسەلەسى تۇرادى" دەپ جازىلعانىن اتاپ وتەدى.
الايدا پوليتسەيلەر زاڭعا قارسى شىققان.
"ياعني، پوليتسەيلەر، وز ءىس-ارەكەتى ارقىلى، قازاقستاننىڭ بالا قۇقىنا قاتىستى حالىقارالىق مىندەتتەمەسىن بۇزدى. قازاقستاننىڭ "بالا قۇقىن قورعاۋ جونىندەگى" مەملەكەتتىك ەمەس ۇيىمى جۇمىس توبى قۇزىرلى ورگانداردىڭ وسى ىسكە ارالاسىپ، بالانىڭ قۇقىن بۇلايشا دورەكى بۇزعانداردى جازالاۋدى وتىنەدى", - دەيدى قۇقىق قورعاۋشىلار.
