شىرىلداعان ءسابي داۋىسىن اجەتحانادان ەستىگەندە قۇتقارۋدان باسقا ەشتەڭە ويلامادىم - پوليتسيا قىزمەتكەرى

4731
Adyrna.kz Telegram

بالانى قوقىس جاشىگىنە تاستاۋ، اجەتحاناعا لاقتىرىپ كەتۋ، كوشە بويىنا قالدىرۋ... ءيا بۇل سۇمدىقتىڭ بارلىعى قازىرگى قوعامدا ورىن الىپ جاتقان جاعدايلار. «ادىرنا» ۇلتتىق پورتالىنىڭ بۇگىنگى كەيىپكەرى وسىدان 6 جىل بۇرىن قۇلسارى قالاسىندا اناسى اجەتحاناعا بوسانىپ، تاستاپ كەتكەن ءسابيدى دەر كەزىندە قۇتقارىپ العان پوليتسيا لەيتەنانتى امانگەلدى مۇقاشەۆ.

امانگەلدى مۇقاشەۆ - اتىراۋ وبلىسى جىلىوي اۋدانىنىڭ اعا تەرگەۋشىسى قىزمەتىن اتقارادى. 2015 جىلدىڭ 7 شىلدەسىندە قۇلسارى قالاسىنداعى تۇرعىن ءۇي اجەتحالارىنىڭ بىرىنەن جاڭا تۋعان ءسابيدى دەر كەزىندە قۇتقارىپ، اجالدان اراشالاپ قالدى. «ادىرنا» ءتىلشىسى كەيىپكەرىمىزدەن وقيعانى تەرەڭىرەك بىلگىسى كەلدى.

سول ءبىر ءسات

-بالانى قۇتقارۋ كەزىندە قانداي كۇيدە بولدىڭىز؟ سول ءبىر ءساتتى ەسكە تۇسىرسەك...

-مەنىڭ كەزەكشىلىگىم بولاتىن. حابار كەلىپ تۇسكەن سوڭ، دەرەۋ وقيعا ورنىنا بەت الدىق. ءبىراز ادام اجەتحانا جانىنا جينالىپ قالعان ەكەن. شىنى كەرەك، ويلانىپ تۇرۋعا ەش ۋاقىت بولعان جوق. بار ويىم بالانى قۇتقارۋ ەدى. لەزدە اجەتحانانى بۇزىپ، بالانى الىپ شىقتىم. قۇدايدىڭ دا قۇدىرەتى مىقتى عوي. ءسابي ءناجىستىڭ ۇستىنە ەمەس، ۇيىلگەن توپىراق بەتىندە جاتىر ەكەن...

-مۇمكىن جەدەل جەتپەگەنىڭىزدە ءسابي اجەتحانادا تۇنشىعىپ قالار ما ەدى؟ ادام ءومىرىن قۇتقارۋ ءدال سىزگە بۇيىرعانى قۇدايدان بۇيرىق رەتىندە قابىلدايسىز با؟

-بالانى الىپ شىعامىن دەپ 1 مينۋتقا كىرگەنىم سول ەدى، قاتتى تۇنشىقتىم. قايتا ءسابي جايالىققا ورالعان كۇيىندە بولدى. مەنىڭ ورنىمدا كەز-كەلگەن ادام وسىلاي بىردەن كومەك قولىن سوزۋشى ەدى. مەن – پوليتسەيمىن. سوندىقتان، ول مەنىڭ ازاماتتىق مىندەتىم. ءارى قىزمەتتىك پارىزىم.

مەن دە اكەمىن. شىرىلداعان ءسابيدىڭ داۋسىن ەستىگەن بويدا قۇتقارۋدان باسقا ەشتەڭە ويلاي المادىم.

-بۇل ءىسىڭىز جۇمىستا دا، ومىردە دە كوپ ادامعا ۇلگى بولا ءبىلدى. ءسابيدى ءدىن-امان الىپ شىقتىڭىز. قازىر مەكتەپ قابىرعاسىن اتتاعان بولار. ءومىرىن اجالدان اراشالاپ قالعان مىنا ءسىز تۋرالى بالا ءبىلۋى كەرەك سىڭايلى. اجەسى قامقورلىققا العان ەكەن. حابارلاسىپ، حال-جاعدايىن ءبىلىپ تۇراسىز با؟

ارينە. قازىر بالامەن ارنايى حابارلاسىپ تۇرامىن. كەرەك جاراعىنا كومەكتەسىپ، ويىنشىقتارىن اپەرىپ دەگەندەي. اراسىندا ءبىر قويدى قۇرباندىققا شالىپ اپارىپ تۇرامىن. قولىمنان كەلگەنشە كومەكتەسىپ ءجۇرمىن. اناسىمەن حابارلاسىپ، اقشالاي دا قول ۇشىن بەرگەن ساتتەرىم بولدى.

-بالانىڭ اناسى قايدا؟ قاندايدا ءبىر جازا قولدانىلدى ما؟

-اناسى 1993 جىلعى ازاماتشا. اقىل-ەسىنىڭ دامۋى تەجەلگەن، اۋىتقۋى بار. ءتىپتى ءوزىنىڭ ەكىقابات ەكەنىن دە بىلمەگەن. باستاپقىدا اجەسى باعىمعا العان ەدى. قازىر اناسىمەن بىرگە تۇرىپ جاتىر. اقىل-ەسىندە اۋىتقۋ بولعاندىقتان ەشقانداي جازا قولدانىلمادى. وسى قىزمەتكە كەلگەلى مۇنداي جاعدايعا جولىققانىم ءبىرىنشى رەت. ءسابيدى سىرتقا تاستاۋ دەگەن سۇمدىق نارسە!

-وسى وقيعا ومىرىڭىزگە قانداي وي سالدى؟ ومىرىڭىزدە وزگەرىستەر ورىن الدى ما؟

-وزگەرىس دەگەندە سول جىلى ءوزىم دە ءسابيلى بولدىم. ايتارلىقتاي دانەگە جوق. قۇتقارۋ ءساتىن مىندەتىم ءھام پارىزىم رەتىندە قابىلدايمىن. ويتكەنى مەنىڭ قىزمەتىم وسى سالادا.

-ارادا 6 جىل ءوتتى. وسىعان ۇقساس جاعدايلار تىركەلدى مە؟

-قازىر تىنىش. ەندى ورىن المايا قويسىن دەپ تىلەيىك.

وزىڭىزدەي قىزمەتىنە ادال ادامدار كوپ بولعاي! اڭگىمەلەسكەنىڭىزگە كوپ راقمەت!

ءىنجۋ ومىرزاق،

"ادىرنا" ۇلتتىق پورتالى 

 

 

پىكىرلەر