الەۋمەتتىك جەلىلەردە تۇركىستان وبلىسىندا تۇسىرىلگەن ۆيدەو قىزۋ تالقىعا ءتۇستى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
بەينەجازبادا تراكتوردىڭ قىزىل كىتاپقا ەنگەن سيرەك وسىمدىك گرەيگ قىزعالداعى ءوسىپ تۇرعان القاپ ارقىلى ءجۇرىپ وتكەنى كورىنەدى.
جەلى قولدانۋشىلارى بۇل جاعدايعا ءارتۇرلى پىكىر ءبىلدىردى. ءبىر بولىگى سيرەك كەزدەسەتىن وسىمدىكتەردىڭ زاقىمدانۋىنا الاڭداسا، ەندى ءبىر توپ جەر يەسىن قولداپ، تەحنيكانىڭ ەگىستىك جيەگىن وڭدەۋ نەمەسە قاۋىپسىزدىك ماقساتىندا جۇرگەن بولۋى مۇمكىن ەكەنىن ايتتى.
وقيعاعا بايلانىستى تۇركىستان وبلىسى پد تۇسىنىكتەمە بەرىپ، ۆيدەوداعى جاعداي بويىنشا تەكسەرىس جۇرگىزىلىپ جاتقانىن حابارلادى. قازىرگى ۋاقىتتا قىزعالداقتاردى جويۋ نەمەسە زاقىمداۋ فاكتىسى تىركەلمەگەن.
ال ورداباسى اۋدانى اكىمدىگىنىڭ مالىمەتىنشە، ۆيدەو تۇسىرىلگەن جەر جەكە مەنشىككە تيەسىلى ەگىستىك القاپ بولىپ تابىلادى. وندا اۋىل شارۋاشىلىعى داقىلدارى، سونىڭ ىشىندە بيداي ەگىلگەن. اكىمدىك جەر يەسىنىڭ اۋماعىنا رۇقساتسىز كىرۋ جاعدايلارى جيىلەگەنىن ايتىپ، قاۋىپسىزدىك ماقساتىندا جول ۋاقىتشا جابىلعانىن دا جەتكىزدى.
مامانداردىڭ ايتۋىنشا، قازاقستاننىڭ قىزىل كىتابىنا 387 وسىمدىك ءتۇرى ەنگىزىلگەن، ولاردىڭ قاتارىندا گرەيگ قىزعالداعى دا بار. زاڭعا سايكەس، سيرەك كەزدەسەتىن وسىمدىكتەردى جويۋعا، جۇلۋعا نەمەسە زاقىمداۋعا قاتاڭ تىيىم سالىنعان.
قولدانىستاعى زاڭناماعا سايكەس مۇنداي ارەكەتتەر ءۇشىن 3 000 اەك-كە دەيىن ايىپپۇل، تۇزەۋ جۇمىستارى، باس بوستاندىعىن شەكتەۋ نەمەسە ءۇش جىلعا دەيىن باس بوستاندىعىنان ايىرۋ جازاسى قاراستىرىلۋى مۇمكىن.
